మంచు విష్ణు డ్రీమ్‌ ప్రాజెక్ట్‌ కన్నప్ప సినిమా కోసం తన సర్వశక్తులు ఒడ్డుతున్నాడు. ఈ సినిమా కోసం దేశ వ్యాప్తంగా ఉన్న ప్రముఖ స్టార్లను అందర్ని సినిమాలోకి దింపుతున్నాడు. ఖర్చుకు కూడా వెనకడడం లేదు. తాజాగా ఈ సినిమా సెట్స్‌ లోకి బాలీవుడ్ స్టార్‌ అక్షయ్‌ కుమార్‌ కూడా అడుగుపెట్టారు.
ఈ సినిమాలో అక్షయ్‌ కీలక పాత్ర పోషిస్తున్నారనే గతవారం రోజులుగా నెట్టింట షికారు చేస్తుంది. దాని గురించి చెబుతూ మంచు విష్ణు అధికారికంగా ప్రకటించారు. అందుకు సంబంధించిన వీడియోను సోషల్ మీడియా వేదికగా ఆయన పంచుకున్నారు. మోహన్‌ బాబు స్వయంగా నిర్మిస్తున్న ఈ చిత్రానికి మహాభారతం సీరియల్‌ ఫేమ్‌ ముఖేష్‌కుమార్‌ సింగ్‌ దర్శకత్వం వహిస్తున్నారు.
అత్యంత భారీ బడ్జెట్‌తో పాన్‌ ఇండియా రేంజ్‌లో ఈ సినిమా రూపుదిద్దుకుంటుంది. ‘కన్నప్ప’ పాత్రలో మంచు విష్ణు నటిస్తుండగా ప్రభాస్‌, మోహన్‌ బాబు, మోహన్‌ లాల్‌, శివ రాజకుమార్‌తో పాటు లేడీ సూపర్‌ స్టార్‌ నయనతార, మధుబాల వంటి స్టార్‌ నటీనటులు సినిమా లో నటిస్తున్నారు. కన్నప్ప సినిమాతో అక్షయ్‌ కుమార్‌ తెలుగు పరిశ్రమలోకి తొలిసారిగా అడుగుపెడుతున్నాడు.
