బెంగుళూరు రేవ్ పార్టీలో వైసీపీ మంత్రి?!

రాజకీయ నాయకులు అందరూ ఇప్పుడు సెలబ్రేషన్ మూడ్ లో ఉన్నారా? ఫలితాలు వెలువడిన తర్వాత పరిస్థితి ఎలా ఉంటుందో? ఏమో? ముందే వీలైనంత ఎంజాయ్ చేసేద్దాం అనుకుంటున్నారా?  పార్టీ అధినేతలు ఎటూ విదేశీయాత్రల్లో ఉన్నారు. ఇక్కడ వైఎస్సార్ కాంగ్రెస్ పార్టీ కి చెందిన ఇతర నాయకులు.. ఈ విరామ సమయాన్ని విచ్చలవిడిగా పండగ చేసుకునే ఉద్దేశంతో ఉన్నారా? అనే చర్చ ఇప్పుడు ప్రజల్లో నడుస్తోంది. బెంగుళూరు పోలీసులు పట్టుకున్న ఒక రేవ్ పార్టీ బాగోతంలో వైఎస్సార్ కాంగ్రెస్ పార్టీకి చెందిన మంత్రి కాకాణి గోవర్దన్ రెడ్డి ఉన్నారా? అనే అనుమానాలు ఇప్పుడు ప్రజల్లో కలుగుతున్నాయి.

బెంగుళూరు శివార్లలోని ఒక ఫాంహౌస్ లో దాదాపు వందమందితో నిర్వహించిన భారీ రేవ్ పార్టీని పోలీసులు ఛేదించారు. పోలీసులు దాడి చేయడంతో ఈ పార్టీలో అనేకమంది తెలుగు టీవీ నటీమణులు, మోడళ్లు పట్టుబడినట్టుగా తెలుస్తోంది. ఒక వ్యాపారవేత్తకు చెందిన ఫాంహౌస్ లో ఈ రేవ్ పార్టీ సాగినట్టు సమాచారం. ఈ దాడిలో పట్టుబడిన వాటిలో జాగ్వార్, బెంజ్ సహా 15 ఖరీదైన కార్లను పోలీసులు సీజ్ చేసినట్టుగా కూడా వార్తలు వచ్చాయి. అయితే ట్విస్టు ఏంటంటే.. ఏపీ మంత్రి కాకాణి గోవర్దన్ రెడ్డికి చెందిన ఎమ్మెల్యే స్టిక్కర్ తో ఉన్న ఒక వాహనం ఈ పార్టీలో సీజ్ అయిన వాటిలో ఉంది. ఈ పార్టీకి సదరు మంత్రే వెళ్లారా? లేదా ఆయన స్వయంగా సొంత వాహనాలకు మాత్రమే వాడవలసిన స్టిక్కర్ ను తీసుకోగలిగేంతటి ఆయన సన్నిహితులు ఆ పార్టీలో ఉన్నారా? అనేది తేలలేదు.

అయితే తన పేరిట ఉన్న ఎమ్మెల్యే స్టిక్కరుతో వాహనం పట్టుబడిందని తెలియగానే మంత్రి కాకాణి అప్రమత్తం అయ్యారు. ఆ పార్టీతో గానీ, ఆ వాహనంతో గానీ తనకు సంబంధం లేదని ఆయన చెప్పేశారు. ఆ స్టిక్కరు 2022 లో చెల్లుబాటు పూర్తయిన స్టిక్కరు అని కూడా ఆయన చెప్పారు. ఎక్స్‌పెయిర్ అయిన స్టిక్కరే కావొచ్చు గాక.. కానీ అలాగని.. ఆయన పేరుతో ఉండే స్టిక్కరును ఎవరు పడితే వారు పొందలేరు కదా అనేది ప్రజల అనుమానం. ఆయన ఎక్స్‌పెయిర్ అయిన స్టిక్కరును తన అనుంగు సహచరులు ఎవరికైనా ఇచ్చారేమో,  వారే ఈ పార్టీలో ఉన్నారేమో అనే అనుమానాలు కలుగుతున్నాయి. అలా కాకపోతే.. తక్షణం ఆ కారు నెంబరు కూడా స్పష్టంగా తెలుస్తున్నది గనుక.. కాకాణి గోవర్దన్ రెడ్డి వారిపై పోలీసులకు ఫిర్యాదు చేయాలి. తన ఎమ్మెల్యే స్టిక్కరును ఆ కారు యజమాని అక్రమంగా వాడుతున్నారని పోలీసులకు ఫిర్యాదు చేయాలి. అలా చేస్తే ఆయన చిత్తశుద్ధిని కొంతవరకైనా నమ్మవచ్చు. ఆ స్టిక్కరు ఎక్స్‌పెయిర్  అయినదనే ఒకే మాటతో తనకు సంబంధం లేదని తప్పించుకోవాలని చూస్తే.. బహుశా ప్రజలు నమ్మకపోవచ్చు.

ఇంకో ట్విస్టు ఏంటంటే.. ఇదే రేవ్ పార్టీలో తెలుగు సినీనటి హేమ కూడా ఉన్నట్టు పుకార్లు వచ్చాయి. అయితే హేమ వాటిని ఖండిస్తూ.. తాను హైదరాబాదులోనే ఉన్నానని, ఫాంహౌస్ లో చిల్ అవుతున్నానని ఒక వీడియో విడుదల చేసి క్లారిటీ ఇచ్చారు.