విశ్వక్ సేన్‌- కృష్ణ చైతన్య- నాగవంశీ కాంబోలో వచ్చిన సినిమా ‘గ్యాంగ్స్ ఆఫ్ గోదావ‌రి’ గురించి అందరికీ తెలిసిందే. మంచి బ‌జ్‌తో విడుద‌లైన ఈ సినిమా బాక్సాఫీసు ముందు పెద్దగా తన సత్తాను చాటలేదు. అంచ‌నాల్ని ఏమాత్రం అందుకోలేక బోల్తాపడి అభిమానులను నిరాశ ప‌రిచింది. అయితే… ఇదే కాంబోలో మరో సినిమా రాబోతోంద‌ని సినీ వర్గాల సమాచారం.
‘గ్యాంగ్స్ ఆఫ్ గోదావ‌రి’ సినిమా రిజ‌ల్ట్ తో సంబంధం లేకుండా కృష్ణ చైత‌న్య‌కు విశ్వక్ మరో ఛాన్స్ ఇచ్చాడని సినీ వర్గాల్లో గుసగుసలు వినిపిస్తున్నాయి. ఒక‌వేళ నిర్మాత మారినా, విశ్వక్ – కృష్ణ చైతన్య కాంబోలో సినిమా ప‌ట్టాలెక్క‌డం మాత్రం కచ్చితమని తెలుస్తుంది.
ఇప్ప‌టికే ఈ మేర‌కు విశ్వక్ ద‌ర్శ‌కుడికి మాట ఇచ్చేసిన‌ట్టు తెలుస్తోంది. అయితే విశ్వక్ మాత్రం ఖాళీగా లేడు. తన చేతి నిండా సినిమాలున్నాయి. మెకానిక్ రాఖీ చిత్రీక‌ర‌ణ ద‌శ‌లో ఉంది. ‘లైలా’ చిత్రాన్ని ఇటీవ‌లే మూవీ మేకర్స్ పట్టాలెక్కించారు. ఇందులో విశ్వక్ లేడీ గెట‌ప్ లో క‌నిపించ‌బోతున్నట్లుగా తెలుస్తుంది. ‘ఫ‌ల‌క్‌నామా దాస్ 2’ కూడా అతి త్వరలోనే రాబోతోంది. మ‌రి వీటి మ‌ధ్య కృష్ణ చైత‌న్య‌కు టైమ్ ఎప్పుడిస్తాడో వేచి చూడాల్సిందే.
