తమిళ స్టార్ సూర్య నటించిన లేటెస్ట్ మూవీ ‘రెట్రో’పై విడుదలకు ముందు మంచి అంచనాలే ఉన్నా, సినిమా రిలీజైన తర్వాత మాత్రం ఆ అంచనాలు పూర్తిగా తారుమారయ్యాయి. దర్శకుడు కార్తీక్ సుబ్బరాజ్ తెరకెక్కించడంతో కథలో కొత్తదనం ఉంటుందనుకున్నారు ప్రేక్షకులు. కానీ సినిమా టీజర్‌లు, ట్రైలర్‌లు వచ్చినప్పటి నుంచే ఆశించినంత ఆసక్తి రేకెత్తించకపోవడంతో, రిలీజ్‌కి వచ్చినప్పుడు ప్రేక్షకుల్లో పాజిటివ్ ఇంప్రెషన్ లేకపోయింది.
సినిమా విడుదలైన తర్వాత కూడా పెద్దగా స్పందన రాకపోవడంతో, ఈ చిత్రం థియేటర్లలో సరైన ఫలితం అందుకోలేకపోయింది. దీంతో ‘రెట్రో’ ఒక ఫెయిల్యూర్ సినిమా అనిపించుకున్నప్పటికీ, ఇప్పుడు మళ్లీ ఈ సినిమాను ఓటీటీ వేదికపై ప్రెజెంట్ చేయాలని మేకర్స్ కొత్త ఐడియాతో ముందుకు వస్తున్నారు.
ఈ సినిమాను కాస్త అడ్డంగా మలచి, అదనపు సన్నివేశాలతో కలిపి వెబ్ సిరీస్ ఫార్మాట్‌లో రిలీజ్ చేయాలని ప్లాన్ చేస్తున్నారు. దర్శకుడు కార్తీక్ సుబ్బరాజ్ ఈ కథకు మరో స్పిన్ ఇవ్వాలనే ఉద్దేశంతో కొత్త కోణాన్ని చూపించాలనుకుంటున్నట్టుగా టాక్ నడుస్తోంది. థియేటర్లో ఫెయిల్ అయిన సినిమా ఇప్పుడు ఓటీటీలో వెబ్ సిరీస్‌గా ఎలా స్పందన అందుకుంటుందో చూడాలి మరి.
ఈ సినిమాలో పూజా హెగ్డే కథానాయికగా కనిపించగా, సంగీతాన్ని సంతోష్ నారాయణన్ అందించాడు. మొత్తానికి, ఓ ఫ్లాప్ మూవీని ఓటీటీలో మరోసారి ట్రై చేయాలని భావిస్తున్న రెట్రో టీమ్ ప్లాన్‌పై మిక్స్‌డ్ రియాక్షన్స్ వస్తున్నాయి.
