రాజ‌మౌళి – మహేష్ బాబు కాంబోలో వ‌చ్చే సినిమా కోసం అభిమానులు ఎప్పటి నుంచో ఎంతో ఆస‌క్తిగా ఎదురు చూస్తున్నారు. ఈ సినిమాపై ఇప్ప‌టికే భారీ అంచ‌నాలు నెలకొన్నాయి. అందుకే ‘ఆర్‌.ఆర్‌.ఆర్‌’ త‌ర‌వాత రాజ‌మౌళి కూడా చాలా గ్యాప్‌ తీసుకొని, ఈ ప్రాజెక్ట్ ని డిజైన్ చేసుకుంటున్నాడు. మహేష్ బాబు తప్ప… మిగిలిన ఏ ఆర్టిస్టునీ ఇప్పటి వ‌ర‌కూ ఫైన‌ల్ చేయ‌లేదు.
ఫృథ్వీరాజ్ సుకుమారన్ ఓ కీల‌క పాత్ర‌లో క‌నిపిస్తాడ‌ని మాత్రం ఎప్పటి నుంచో ప్ర‌చారం జ‌రుగుతున్నా, దాని గురించి మాత్రం చిత్ర‌బృందం ఇప్పటి వరకు ఎలాంటి అధికారిక సమాచారం ఇవ్వ‌లేదు. ఈ సినిమా కోసం ఇండోనేషియా నుంచి చెస్లా అనే హీరోయిన్‌ని రంగంలోకి దింపిన‌ట్టు ఓ వార్త చక్కర్లు కొడుతుంది. దాదాపు ఆమెను క‌థానాయిక‌గా ఫిక్స్ చేసిన‌ట్టే తెలుస్తుంది. ఇప్పుడు ఈ సినిమాలో విలన్ పాత్ర కోసం విక్రమ్ ని సంప్ర‌దించిన‌ట్టు సమాచారం. చిన్న పాత్ర అయినా, అందులో స్టార్ డ‌మ్ ని మిక్స్ చేయ‌డానికి రాజ‌మౌళి చాలా కష్టపడతాడు.
విలన్ పాత్ర కోసం కూడా ఆయ‌న ప్ర‌త్యేక‌మైన శ్ర‌ద్ధ తీసుకొంటాడు. ఇప్పుడు ఆయ‌న దృష్టి విక్రమ్ పై ప‌డిందని తెలుస్తుంది. రాజ‌మౌళి నుంచి ఆఫ‌ర్ రాగానే… ఎంత పెద్ద స్టార్ అయినా, కచ్చితంగా ఒప్పుకుంటారనే సంగతి తెలిసిందే. ఆయ‌న స్థాయి అలా ఉంటుంది మరి. విక్రమ్ ఈ ఆఫ‌ర్ కు `నో` చెప్పే అవ‌కాశం లేదు. సో.. మహేష్ విలన్ గా విక్రమ్ దాదాపుగా ఖరారు అయిపోయిన‌ట్టే. ఈ సంవత్సరం చివ‌ర్లో ఈ సినిమా ప‌ట్ట‌లెక్కుతుంది. 2026లో ప్రేక్ష‌కుల ముందుకు వ‌చ్చే అవ‌కాశం కూడా కనిపిస్తుంది. ఈలోగా మహేష్ మరో సినిమా చేయ‌డు. క‌నీసం క‌మ‌ర్షియ‌ల్ యాడ్‌లో కూడా క‌నిపించ‌డు. మహేష్ లుక్ రివీల్ కాకూడ‌ద‌న్న ఉద్దేశంతో రాజ‌మౌళి ఈ కండీష‌న్ పెట్టినట్లు సమాచారం.
