సౌత్ ఇండియన్ ఇంటర్నేషనల్ మూవీ అవార్డ్స్ అంటేనే సౌత్ సినిమా ప్రేమికులకి ఒక పండుగలా మారిపోయింది. ప్రతి సంవత్సరం జరుగుతున్నట్లుగానే ఈసారి కూడా 2025 అవార్డుల వేడుక అద్భుతంగా జరిగింది. దుబాయ్ వేదికగా భారీ స్థాయిలో ఏర్పాట్లు చేసి, అనేకమంది స్టార్ హీరోలు, హీరోయిన్లు, దర్శకులు, టెక్నీషియన్లు హాజరయ్యారు. ఆ గ్లామరస్ ఈవెంట్ లో టాలీవుడ్ సినిమాకి సంబంధించిన అవార్డు విన్నర్స్ పేర్లు ఇప్పుడు బయటకు వచ్చాయి.
ఈసారి ప్రధాన అవార్డుల్లో కల్కి సినిమా ముందంజ వేసింది. ఆ చిత్రాన్ని బెస్ట్ మూవీగా ఎంపిక చేశారు. దర్శకుడిగా సుకుమార్ మరోసారి తనదైన స్టైల్ తో విజేతగా నిలిచాడు. ఇక క్రిటిక్స్ కేటగిరీలో ప్రశాంత్ వర్మకి బెస్ట్ డైరెక్టర్ అవార్డు దక్కగా, నటుల విభాగంలో అల్లు అర్జున్ బెస్ట్ యాక్టర్ అవార్డుతో మెప్పించాడు. అదే సమయంలో తేజ సజ్జా క్రిటిక్స్ ఛాయిస్ యాక్టర్‌గా నిలిచి ప్రత్యేకంగా ఆకట్టుకున్నాడు.
హీరోయిన్స్ విషయానికి వస్తే రష్మిక మందన్నా బెస్ట్ యాక్ట్రెస్ అవార్డును అందుకోగా, క్రిటిక్స్ కేటగిరీలో మీనాక్షి చౌదరి గెలిచింది. సహాయ నటుల విభాగంలో అమితాబ్ బచ్చన్, అన్నే బెన్ లకు అవార్డులు దక్కాయి. మ్యూజిక్ లో దేవి శ్రీ ప్రసాద్ మరోసారి తన మ్యూజిక్ తో సత్తా చాటగా, పాటల విభాగంలో రామ్ జోగయ్య శాస్త్రి, శంకర్ బాబు కందుకూరి, శిల్పా రావు తలా తమ కేటగిరీలలో గుర్తింపు తెచ్చుకున్నారు.
ప్రతినాయకుడి పాత్రలో కమల్ హాసన్ అద్భుతమైన నటనతో బెస్ట్ విలన్ గా నిలిచాడు. కొత్తగా రంగప్రవేశం చేసిన వారిలో పంకూరి, భాగ్యశ్రీ బోర్స్ బెస్ట్ డెబ్యూ యాక్ట్రెస్ అవార్డు దక్కించుకున్నారు. సందీప్ సరోజ్ బెస్ట్ డెబ్యూ యాక్టర్‌గా ఎంపిక అయ్యాడు. దర్శకుల విభాగంలో నంద కిషోర్ యేమని కొత్త దర్శకుడిగా గుర్తింపు పొందాడు.
కొత్త నిర్మాతగా నిహారిక కొణిదెలని సత్కరించగా, సినిమాటోగ్రఫీ విభాగంలో రత్నవేలు తనదైన విజువల్స్ తో గెలిచాడు. హాస్యం వైపు సత్య మరోసారి ప్రేక్షకులను ఆకట్టుకొని అవార్డు గెలుచుకున్నాడు.
