యంగ్‌ అండ్‌ డైనమిక్‌ హీరో మంచు విష్ణు ఎంతో ప్రతిష్టాత్మకంగా తెరకెక్కిస్తున్న పాన్‌ ఇండియా సినిమా డ్రీమ్‌ ప్రాజెక్ట్‌ ‘కన్నప్ప’ మూవీ ప్రమోషన్స్‌ అప్టేట్స్‌ను ప్రతి సోమవారం విడుదల చేస్తున్న సంగతి తెలిసిందే. సినిమాలో కీలకమైన, విభిన్నమైన, ప్రధాన పాత్రలను పోషిస్తున్న దిగ్గజ నటీనటుల లుక్స్‌కు సంబంధించిన పోస్టర్స్‌ విడుదల చేస్తూ సినిమాపై ఆసక్తిని పెంచుతుంది.
టీం ఇప్పటికే ఈ సినిమా నుంచి మధుబాల,శరత్‌కుమార్‌, దేవరాజ్‌ వంటి ప్రముఖ నటులు పోషిస్తున్న పాత్రలకు పరిచయం చేస్తూ, వారి పాత్రలకు సంబంధించిన పోస్టర్‌లను విడుదల చేశారు. తాజాగా ఈ సినిమాలో ప్రముఖ నటుడు ముఖేష్ రుషి పోషిస్తున్న పాత్రకు సంబంధించిన ఫస్ట్‌లుక్‌తో పాటు మరో ప్రముఖ నటుడు బ్రహ్మజీ పాత్రకు సంబంధించిన ఫస్ట్‌లుక్‌ పోస్టర్‌ను విడుదల చేశారు.
కంపడు పాత్రలో ముఖేష్ రిషి, గవ్వరాజుగా బ్రహ్మాజీ ఈ చిత్రంలో కనిపించనున్నారు. వారు అత్యంత పురాతన పుళిందుల జాతికి చెందిన అత్యంత భయంకరమైన తెగకు చెందినవారని వెల్లడించారు.సదాశివ కొండలలో జన్మించిన వీరిని భద్రగణం అని కూడా అంటారు, వారు ‘వాయులింగానికి వంశపారంపర్య సేవకులు, రక్షకులు. కంపడు నాయకుడు భద్రగణాన్ని నడిపిస్తాడు. ఈ వంశం త్రిశూలాలను ఉపయోగించడంలో ప్రత్యేకత కలిగి ఉన్నవారు.
ఈ ఫస్ట్ లుక్ పోస్టర్‌లో ముఖేష్ రిషితో పాటు బ్రహ్మాజీ కూడా కనిపించారు. పోస్టర్‌లో వారి లుక్ ఫెరోషియస్‌గా కనిపిస్తుంది.
