సోషల్ మీడియా కార్యకర్తలు అనే ముసుగులో నీచత్వానికి పాల్పడే వారి భరతం పట్టడానికి రాష్ట్రంలో పోలీసు యంత్రాంగం కొరడా ఝుళిపిస్తోంది. ఓవరాక్షన్ చేసే ఏ ఒక్కరినీ వదిలిపెట్టడం లేదు. కేసులు నమోదు అవుతున్నాయి. వారి వారి ప్రవర్తన తీరును బట్టి.. 41ఏ నోటీసులు ఇచ్చి పంపేయడమూ, అరెస్టులు చేసి కోర్టులో హాజరు పరచడమూ అన్నీ జరుగుతున్నాయి. అదే సమయంలో ఇక్కడ పోలీసులు కొరడా ఝుళిపించడం ప్రారంభించిన తర్వాత.. వైసీపీ సోషల్ మీడియా వికృత మూకల్లో కూడా కొంత మార్పు వచ్చింది. చాలా మంది బేషరతుగా లెంపలు వాయించుకుంటున్నారు. ఇకపై ఎప్పుడూ ఇలాంటి తప్పులు చేయం.. మిమ్మల్ని క్షమించి వదిలేయండి అని విన్నవించుకుంటున్నారు. అదే సోషల్ మీడియా హ్యాండిల్స్ మీదనుంచే తమ క్షమాపణను, పశ్చాత్తాపాన్ని తెలియజేస్తున్నారు.
అయితే తమ పార్టీ వారిని అరెస్టు చేసేస్తున్నారని, వేధిస్తున్నారని కొడుతున్నారని రకరకాలుగా ఆరోపణలు చేయడానికి వైసీపీ నాయకుల దండు బయల్దేరి డీజీపీ వద్దకు వెళ్లారు. ద్వారకా తిరుమల రావును కలిసి.. తమ పార్టీవారిపై వేధింపుల గురించి ఫిర్యాదు చేశారు. అలాగే పోలీసుల మీద కూడా చర్య తీసుకోవాలని కోరారు. తమ పార్టీ నేతల మీద కూడా అసభ్య పోస్టులు పెడుతున్నారు అని స్వయంగా డీజీపీకే ఫిర్యాదుచేశారు. డీజీపీకి ఫిర్యాదుచేసిన బృందంలో.. అంబటి రాంబాబు, లేళ్ల అప్పిరెడ్డి, ఆదిమూలపు సురేశ్, కైలే అనిల్ కుమార్, మల్లాది విష్ణు తదితరులు ఉన్నారు.
అయితే ఇక్కడే అసలు విషయం బయటకు వస్తోంది. చంద్రబాబు నాయుడు ప్రభుత్వానికి – జగన్ ప్రభుత్వానికి మధ్య ఉన్న వ్యత్యాసం ఇక్కడే బయటపడుతున్నదని పలువురు విశ్లేషకులు వ్యాఖ్యానిస్తున్నారు. జగన్మోహన్ రెడ్డి పరిపాలన సాగించిన అయిదేళ్ల కాలంలో తెలుగుదేశం వారికి అసలు డీజీపీని కలిసేందుకు అపాయింట్‌మెంట్ కూడా దొరికేది కాదని గుర్తుచేస్తున్నారు. స్వయంగా తానే మాజీ పోలీసు అధికారి అయిన వర్ల రామయ్య ఆధ్వర్యంలో తెదేపా బృందం తమ పార్టీ వారి పట్ల జరుగుతున్న అన్యాయాల గురించి విన్నవించుకోవడానికి ఎన్నిసార్లు అపాయింట్‌మెంట్ అడిగినప్పటికీ.. అప్పటి డీజీపీ రాజేంద్రనాథ్ రెడ్డి కనీసం టైం ఇవ్వలేదు.
తెలుగుదేశం పాలనలో అలాంటి ఏకపక్ష పోకడలు లేవని.. ప్రజాస్వామ్యంలో అందరికీ సమాన అవకాశాలు అన్నట్టుగానే.. ప్రతిపక్ష నాయకులకు కనీసం డీజీపీని కలిసేచాన్సు దొరుకుతోందని.. అందుకు అంబటి సంతోషించాలని ప్రజలు అంటున్నారు. జగన్ కాలం నాటి అకృత్యాలను పోల్చుకుంటే.. ఇప్పటి పరిస్థితికి వారే మురిసిపోతారని కూడా అంటున్నారు.
