టాలీవుడ్ సూపర్ స్టార్ మహేశ్ బాబు ప్రస్తుతం స్టార్ డైరెక్టర్ ఎస్ఎస్.రాజమౌళి డైరెక్షన్‌లో SSMB29 మూవీ కోసం తనని తాను రెడీ చేసుకుంటున్నాడు. ఈ సినిమా కోసం మహేశ్ ప్రస్తుతం కొత్త లుక్‌కోసం మేకోవర్ చేస్తున్నాడు. అయితే, ఇప్పుడు మహేశ్ రాజమౌళి సినిమా కంటే ముందే, బిగ్ స్క్రీన్‌పై కనిపించబోతున్నాడని సినీ వర్గాల్లో ఓ టాక్‌ వినపడుతుంది.
అశోక్ గల్లా హీరోగా తెరకెక్కుతున్న తాజా సినిమా ‘దేవకీ నందన వాసుదేవ’ సినిమా ఇప్పటికే షూటింగ్ పనులు ముగించుకుని విడుదలకు సిద్దం అయ్యింది.ఈ సినిమాకు దర్శకుడు ప్రశాంత్ వర్మ కథను అందించగా, అర్జున్ జంధ్యాల తెరకెక్కిస్తున్నాడు. ఇక ఈ సినిమాను నవంబర్ 14న విడుదల చేసేందుకు మేకర్స్ సిద్దమవుతున్నారు. అయితే, ఈ సినిమాలో శ్రీకృష్ణుడి పాత్రలో సూపర్ స్టార్ మహేశ్ బాబు కనిపించబోతున్నట్లు వార్తలు వినపడుతున్నాయి.
ఇది కేమియో పాత్ర అని.. అందుకే మహేశ్ బాబు ఈ పాత్రలో నటించబోతున్నాడని తెలుస్తోంది. ఈ వార్త ప్రస్తుతం సోషల్ మీడియాలో వైరల్‌ అవుతుంది. తమ అభిమాన హీరోను మరో 2-3 ఏళ్ల వరకు వెండితెరపై చూడలేమా అని అనుకుంటున్న సూపర్ స్టార్ అభిమానులకు ఇదొక సర్‌ప్రైజ్ వార్తే అని చెప్పాలి. మరి ఈ సినిమాలో నిజంగానే మహేశ్ బాబు శ్రీకృష్ణుడిగా కనిపిస్తాడా లేదా అనేది మాత్రం వేచి చూడాల్సిందే.
