సూపర్ స్టార్ మహేష్ బాబు ఈ ఏడాది గుంటూరు కారం సినిమాతో ప్రేక్షకుల ముందుకు వచ్చి విజయాన్ని అందుకున్నారు. ఈ క్రమంలోనే దర్శకధీరుడు రాజమౌళితో ఓ సినిమా చేస్తున్నట్లు ప్రకటించారు. దానికి ప్రస్తుతం వర్కింగ్‌ టైటిల్‌ గా ఎస్‌ఎస్‌ఎంబీ 29 అని పెట్టారు. ఈ సినిమాని శ్రీ దుర్గా ఆర్ట్స్ బ్యానర్‌ పై నిర్మాత కేఎల్ నారాయణ నిర్మించనున్నారు.
ఇప్పటికే ఈ సినిమా కోసం మహేష్ బాబు తన కసరత్తులు మొదలు పెట్టేశాడు. కొద్ది రోజుల క్రితం మహేష్ ఓ రెండు యాడ్‌ షూటింగ్ లలో పాల్గొన్నాడు. ఆ తరువాత సమ్మర్ హాలీడేస్ కోసం ప్రస్తుతం కుటుంబంతో కలిసి విదేశాలకు బయల్దేరాడు. ఈ సందర్భంగా వారు విమానాశ్రయంలో ఉన్న కొన్ని చిత్రాలను మహేష్ భార్య నమ్రత తన ఇన్‌ స్టాలో పోస్ట్‌ చేసింది.
అందులో మహేష్ లుక్‌ కొత్తగా ఉండడంతో రాజమౌళి సినిమా కోసం ఆయన కష్టపడుతున్నట్లు అభిమానులు కామెంట్‌ చేస్తున్నారు.
