సలార్ , కల్కి సినిమాల సూపర్‌ సక్సెస్‌ తో ప్రభాస్ అభిమానులు ప్రస్తుతం ఫుల్‌ స్వింగ్‌ లో ఉన్నారు. ప్రభాస్ కూడా అదే జోరును కొనసాగిస్తూ…టాలెంటెడ్‌ డైరెక్టర్లతో వరుస పెట్టి సినిమాలు చేస్తు ముందుకు దూసుకుపోతున్నాడు.ఈ జోరులోనే తన కెరీర్లో ఇంత వరకు టచ్ చేయని రొమాంటిక్ హారర్ జానర్‌ “రాజా సాబ్” సినిమా చేస్తున్నాడు.
తన ఫ్యాన్స్ ఎప్పటికీ గుర్తుండిపోయేలా ప్రభాస్‌ను స్క్రీన్‌పై ప్రెజెంట్ చేయబోతున్నాడు దర్శకుడు మారుతి. కాగా, ఈ చిత్రం వచ్చే ఏడాది ఏప్రిల్ 10న తమిళం, మలయాళం, కన్నడ, హిందీ భాషల్లో విడుదల కాబోతుంది. ఇప్పటికే విడుదలైన గ్లింప్స్ అభిమానులకు తెగ నచ్చేసింది. అయితే తాజాగా చిత్రబృందం నుండి వచ్చిన అప్‌డేట్ అభిమానులను మరింత ఉత్కంఠకు గురిచేస్తోంది.ఈ సినిమాలో ప్రభాస్ టైటిల్ రోల్ పోషిస్తుండగా, నిధి అగర్వాల్, రిద్ధి కుమార్, మాళవిక మోహనన్ ప్రధాన పాత్రలు పోషిస్తున్నారు.
తమన్ సంగీతం అందిస్తున్నాడు. దీంతో అభిమానుల్లో భారీ అంచనాలు ఏర్పడ్డాయి. ఈ నేపథ్యంలో శరవేగంగా జరుగుతున్న ఈ సినిమా షూటింగ్ నవంబర్‌లో పూర్తికానుందని సమాచారం. దీంతో అభిమానులు సంబరాలు చేసుకుంటున్నారు. ప్రభాస్ త్వరలో చేయబోయే ఫౌజీ, సలార్ 2, స్పిరిట్, కల్కి పార్ట్ 2 చిత్రాలను పూర్తి చేసే అవకాశాలున్నాయి. మాస్ హీరో పక్కన ఇద్దరు హీరోయిన్లు కాలు కదిపితే ఇక అభిమానుల ఆనందానికి అవధులే ఉండవు. అలాంటిది ముగ్గురు హీరోయిన్లు నటిస్తే ఇక థియేటర్లు అన్ని షేక్‌ అవ్వాల్సిందే.
అలాంటి సందడి ‘ది రాజా సాబ్’లో ఉంటుంది. ప్రభాస్ మాస్ ఇమేజ్, మారుతి కామెడీ స్టైల్ ఫ్యాన్స్ కేవలం విజిల్స్ వేసే క్షణాలకే పరిమితం కాలేదు. ఈ సినిమాలో ఇంకా చాలా సర్ ప్రైజ్ లు ఉన్నాయి. అందులో ఒక స్పెషల్ సాంగ్ ఒకటి ఉంటుంది. ప్రభాస్ స్టైలిష్ డ్యాన్స్ చూసి చాలా రోజులైంది. ఆ లోటు ‘రాజా సాబ్’తో తీరబోతోంది. ఇందులో హీరోయిన్లుగా చేస్తున్న నిధి అగర్వాల్, రిద్దికుమార్, మాళవిక మోహనన్ ముగ్గురితో ఆడిపాడేలా ప్రభాస్ కోసం ప్రత్యేకంగా ఓ పాటను డిజైన్ చేశారు. ఈ పాట థియేటర్లను ఓ ఊపు ఊపేయనుందని తెలుస్తుంది. డార్లింగ్‌తో మాస్సే స్టెప్పులు వేయించాలనే లక్ష్యంతో మారుతీ ఈ పాటను రూపొందించారని తెలుస్తుంది.
ఈ మధ్య కాలంలో స్టార్ హీరో పక్కన ముగ్గురు హీరోయిన్లు డ్యాన్స్ చేసిన సందర్భాలు చాలా అంటే చాలా తక్కువే. ఈ జనరేషన్‌లో ఏ హీరోకి అవకాశం రాలేదనే చెప్పాలి.ఈ సినిమా టీజర్‌ను ప్రభాస్ పుట్టినరోజు కానుకగా రీలీజ్ చేసేందుకు మేకర్స్ ప్లాన్ చేస్తున్నారు.
