ఒకప్పుడు హీరో, విలన్‌ గా నటించి తనకంటూ ప్రత్యేక స్థానాన్ని సంపాదించుకున్న నటుడు శ్రీకాంత్. తన సెకండ్‌ ఇన్నింగ్స్‌ లో క్యారెక్టర్ ఆర్టిస్ట్‌ నటిస్తూ సత్తా చాటుతున్న సంగతి తెలిసిందే. అయితే శ్రీకాంత్ కుమారుడిగా రోషన్ మేక సోలో హీరోగా ఇండస్ట్రీకి పరిచయమై దాదాపు మూడేళ్లు దాటుతోంది. నిర్మలా కాన్వెంట్ సినిమాతో తెలుగు ప్రేక్షకులకు పరిచయమయ్యాడు రోషన్. 2021లో పెళ్లి సందడి సినిమాతో మంచి హీరోగా గుర్తింపు తెచ్చుకున్నాడు.
ఈ సినిమాలో శ్రీలీల హీరోయిన్ గా నటించింది. ఆ సినిమా బ్లాక్ బస్టర్ కాకపోయినాప్పటికీ పాజిటివ్ టాక్ అయితే అందుకుంది. ఆ సినిమా తర్వాత శ్రీలీల స్టార్ హీరోయిన్ అయిపోయింది. మళ్లీ ఇన్నాళ్లకు ప్రముఖ ప్రొడక్షన్ హౌస్ వైజయంతి మూవీస్ బ్యానర్ లో రోషన్ హీరోగా ఛాంపియన్ అనే సినిమా రూపుదిద్దుకోబోతుంది. చిత్ర యూనిట్ ఈ సినిమా గురించి అధికారిక ప్రకటన చేసి నెలలు గడుస్తోంది
ఇది ఒక భారీ బడ్జెట్ సినిమాగా రూపుదిద్దుకోనుంది. కానీ గత కొంతకాలంగా ఈ సినిమా గురించి ఒక్క అప్డేట్ కూడా ప్రేక్షకుల ముందుకు రాలేదు. తాజాగా ఈ సినిమాపై క్రేజీ అప్ డేట్ ఇచ్చింది చిత్రయూనిట్. ఈ సినిమా షూటింగ్ మొదలు పెట్టినట్లు ఓ మోషన్ పోస్టర్ కూడా విడుదల అయ్యింది. ఈ పోస్టర్ లో కల్కి ఫేమ్ నాగాశ్విన్ క్లాప్ కొడుతున్నట్లు కనిపిస్తుంది. ఈ చిత్రానికి ప్రదీప్ అద్వైతం దర్శకత్వం వహిస్తున్నారు. ఈ చిత్రానికి సంబంధించిన కాస్ట్ వివరాలు త్వరలోనే ప్రకటించే అవకాశాలున్నాయి.
ఇదిలా ఉంటే మ‌ల‌యాళ సూప‌ర్ స్టార్ మోహ‌న్ లాల్ న‌టిస్తోన్న భారీ బడ్జెట్ పాన్ ఇండియా మూవీ ‘వృషభ’. ఈ సినిమాలో మోహ‌న్ లాల్ త‌న‌యుడుగా రోషన్ మేక కనిపించబోతున్నారు. భారీ బ‌డ్జెట్‌తో వృషభ తెర‌కెక్క‌నుంది. తండ్రీ కొడుకుల మ‌ధ్య సాగే డ్రామాగా ఈ చిత్రాన్ని రూపొందించ‌నున్నారు.
