నేను శైలజ సినిమాతో టాలీవుడ్ లో ఎంట్రీ ఇచ్చింది ముద్దుగుమ్మ కీర్తి సురేష్. ఆ సినిమా సూపర్ హిట్ కావడంతో టాలీవుడ్ లో వరుస ఆఫర్లు వచ్చాయి. ఆ సినిమా తరువాత తెలుగు చిత్ర పరిశ్రమ గర్వించ దగ్గ సినిమా మహానటి లో అవకాశం దక్కించుకుంది. ‘మహానటి’ లో సావిత్రి పాత్రలో కీర్తి తప్ప మరో నటిని ఊహించుకోలేము అన్నట్లుగా నటించి ప్రేక్షకులతో కంటతడి పెట్టించింది. ఇటీవల టాలీవుడ్ లో కొద్దిగా ఆఫర్లు తగ్గినా కోలీవుడ్ లో మాత్రం వరుస సినిమాలు చేస్తూ ముందుకు దూసుకుపోతుంది.
ఈ క్రమంలోనే కీర్తి సురేష్ ప్రధాన పాత్రలో తమిళంలో రూపొందిన చిత్రం ‘రఘు తాత’. సుమన్ కుమార్ దర్శకత్వంలో ఈ మూవీ తెరకెక్కుతోంది. తాజాగా ‘రఘు తాత’ ట్రైలర్ ను చిత్ర బృందం విడుదల చేసింది. ‘మలుపులతో కూడిన వినోదాన్ని ఆస్వాదించేందుకు రెడీగా ఉండండి’ అంటూ కాప్షన్ ను కూడా కింద జత చేశారు.
కయల్విజి పాత్రలో పక్కింటి అమ్మాయిలాగా సహజంగా నటిస్తూ నవ్వులు పూయిస్తూ సాగిన ట్రైలర్‌లో కీర్తి నటన విపరీతంగా ఆకట్టుకుంది. హిందీ రాని ఓ తమిళ యువతీ ఎటువంటి సవాళ్ళను ఎదుర్కొంది… చివరికి వాటిని ఎలా అధిగమించింది అనే కథ నేపథ్యాన్ని ఎంచుకున్నాడు దర్శకుడు సుమన్ కుమార్. ఈ సినిమాలో రవీంద్ర విజయ్, ఎమ్మెస్‌ భాస్కర్‌ ఆనంద్‌ సామి, దేవదర్శిని కీలక పాత్రలలో యాక్ట్‌ చేశారు.
‘రఘు తాత’ సినిమాకి శ్యాన్‌ రోల్డన్‌ సంగీతం అందించారు. కన్నడలో భారీ బడ్జెట్ చిత్రాలు కేజీఎఫ్, కాంతారా వంటి ఇండస్ట్రీ హిట్ సినిమాలు నిర్మించిన హోంభలే ఫిలిమ్స్‌ పతాకంపై విజయ్ కిరగందుర్ ఈ సినిమాని నిర్మించారు. ఆగస్టు 15న భారీ బడ్జెట్ చిత్రాల మధ్య పోటీగా ఈ మూవీ విడుదల కాబోతుంది.
