గతేడాది సంక్రాంతికి బాక్సాఫీస్ వద్ద నందమూరి బాలయ్య బాబు ,మెగాస్టార్ చిరంజీవి సినిమాలు వార్‌ లో నిలిచాయి. రెండు సినిమాలు కూడా ఆశించిన స్థాయిలో విజయాన్ని అందుకున్నాయి. వీర సింహారెడ్డిగా బాలయ్య బాబు రెచ్చిపోతే.. వాల్తేరు వీరయ్యగా చిరు రచ్చ చేశాడు. అయితే ఈ సారి సంక్రాంతి మాత్రం చిరు వర్సెస్ రవి తేజ అన్నట్లుగా ఉండేటట్లు ఉంది.
వాల్తేరు వీరయ్య సినిమాలో చిరు, రవితేజ కలిసి నటించారు. బాక్సాఫీస్‌ను షేక్ చేశారు. కానీ ఈసారి మాత్రం ఇద్దరి మధ్య పోటీ జరగనుండడతో ఆసక్తిగా మారింది. మెగాస్టార్ నటిస్తున్న విశ్వంభర సినిమాను సంక్రాంతికి రిలీజ్ చేస్తున్నట్టుగా ఇప్పటికే మేకర్స్ ప్రకటించారు. ఈ సినిమాని బింబిసార డైరెక్టర్ వశిష్ట తెరకెక్కిస్తున్న విషయం తెలిసిందే.
ఈ సినిమా వచ్చే ఏడాది సంక్రాంతి కానుకగా జనవరి 10న రిలీజ్ కానుంది. జగదేక వీరుడు అతిలోక సుందరి తర్వాత.. చిరు చేస్తున్న భారీ సోషియో ఫాంటసీ సినిమా కావడంతో విశ్వంభరపై భారీ అంచనాలు నెలకొన్నాయి. ప్రస్తుతం ఈ సినిమా షూటింగ్‌ జరుపుకుంటుంది.
మరోపక్క మాస్ మహారాజా రవితేజ.. మెగాస్టార్‌తో బాక్సాఫీస్ ఫైట్‌కు రెడీ గా ఉన్నా అంటున్నాడు .ఉగాది సందర్భంగా రవితేజ కొత్త సినిమా అనౌన్స్మెంట్ వచ్చేసింది. సమాజవరగమన సినిమాకు రచయితగా పని చేసిన భాను భోగవరపుని దర్శకుడిగా పరిచయం చేస్తూ.. సితార ఎంటర్టైన్మెంట్స్ సంస్థ ఓ సినిమాను తీస్తుంది.
ఈ సినిమాను కూడా వచ్చే సంక్రాంతికే రిలీజ్ చేస్తున్నట్టుగా ఈరోజు ప్రకటించారు. ‘వచ్చే సంక్రాంతికి రవన్న దావత్ ఇస్తుండు.. రెడీ అయిపొండ్రి’ అంటూ చెప్పేశారు. దీంతో ప్రస్తుతానికి 2025 సంక్రాంతికి చిరంజీవి వర్సెస్ రవితేజగా మారిపోయింది.
