టాలీవుడ్ హిట్‌ సినిమా దసరా కాంబోలో మరో సినిమా రాబోతున్న సంగతి తెలిసిందే. నాని – శ్రీ‌కాంత్ ఓదెల కలిసి మరో సినిమా చేయ‌బోతున్న సంగతి తెలిసిందే. ఇందులో హీరోయిన్‌ గా జాన్వీ క‌పూర్‌ని ఎంచుకొన్నట్టు వార్తలు వినిపించాయి. చిత్ర‌బృందం అధికారికంగా ప్ర‌క‌టించ‌క‌పోయినా, జాన్వీ ఎంట్రీ దాదాపుగా ఖరారనే తెలుస్తుంది. జాన్వీకి ఇప్పటికే తెలుగులో మంచి క్రేజ్ ఉంది. తెలుగులో తాను న‌టించిన సినిమా ఏదీ ఇప్ప‌టి వ‌ర‌కూ అభిమానుల ముందుకు రాలేదు. కానీ వ‌రుస‌గా క్రేజీ ప్రాజెక్టులు త‌న వద్దకు వరుస కడుతున్నాయి.
ప్ర‌స్తుతం ‘దేవ‌ర’లో జాన్వీ న‌టిస్తోంది. ఆ తరువాత రామ్ చ‌ర‌ణ్ – బుచ్చిబాబు కాంబోలో రూపుదిద్దుకొంటున్న సినిమాలోనూ త‌నే క‌థానాయిక. ‘పుష్ష 2’లో ఐటెమ్ పాట కోసం కూడా జాన్వీ పేరు ప‌రిశీలిస్తున్నారు. కాక‌పోతే.. నాని ప‌క్క‌న జాన్వీ పాత్ర ఎలా ఉంటుందనేది నాని అభిమానుల ప్ర‌శ్న. ‘అన్నా.. నీకు జాన్వీ సెట్ కాదు..’ అంటూ కొంత‌మంది నాని ఫ్యాన్స్ ఇప్పటికే నానికి స‌ల‌హాలు ఇస్తున్నారు. జాన్వీ నానికి అక్క‌లా ఉంటుంద‌ని కొంత‌మంది ట్రోల్‌ చేస్తున్నారు.
‘ద‌స‌రాలో కీర్తి సురేష్ తో నీ జోడీ బాగుంది క‌దా, త‌న‌నే తీసుకోండి’ అంటూ ఈ టాపిక్‌లోకి కీర్తిని కూడా ఇన్వాల్వ్‌ చేస్తున్నారు. నాని క‌థ‌ల ఎంపిక ఎంత ప‌ర్‌ఫెక్ట్ గా ఉంటుందో, ఆ క‌థ‌లో త‌న‌కు జోడీగా హీరోయిన్ల‌నీ అంతే ప‌ర్‌ఫెక్ట్‌గా ఎంచుకుంటాడనే టాక్‌. ‘హాయ్ నాన్న’లో మృణాల్ విష‌యంలో త‌ప్పు చేశాడ‌న్న‌ది నాని అభిమానులు ఇప్పటికీ అంటున్నారు. ఆ సినిమాలో మృణాల్ తో నాని కెమిస్ట్రీ మిస్ మ్యాచ్ అయ్యింద‌ని, నాని ప‌క్క‌న మృణాల్ వ‌య‌సు ముదిరిన పిల్ల‌లా క‌నిపించింద‌న్న కామెంట్లు వచ్చాయి. జాన్వీ విష‌యంలోనూ అదే జ‌రుగుతుంద‌న్న‌ది అభిమానుల బెంగ. మ‌రి ఈ విష‌యంలో నాని ఎలాంటి నిర్ణ‌యం తీసుకొంటాడో చూడాల్సిందే.
