పాన్ ఇండియా లెవెల్లో ఇప్పుడు ఒక యానిమేషన్ సినిమా ఊహించని రీతిలో హిట్ కొడుతోంది. ఇందులో బిగ్ స్టార్‌లు లేరు, ప్రాచుర్యమైన నటీనటులు కూడా లేరు. అయినా ఈ సినిమా బాక్సాఫీస్ వద్ద విజయవంతంగా దూసుకెళ్తోంది. “మహావతార్ నరసింహ” అనే ఈ యానిమేటెడ్ చిత్రం, దర్శకుడు అశ్విన్ చేతుల మీదుగా రూపొందింది. మొదట చిన్న స్థాయిలో కనిపించిన ఈ సినిమా ఇప్పుడు దేశవ్యాప్తంగా సందడి చేస్తోంది.
తెలుగు, హిందీ భాషల్లో విడుదలైన ఈ సినిమా రెండు మార్కెట్లలోనూ మంచి ఆదరణ పొందుతోంది. ముఖ్యంగా హిందీ వెర్షన్ నార్త్ ఇండియాలో మంచి పరాక్రమం చూపిస్తోంది. వీక్ డేస్ అయినప్పటికీ అక్కడ దాని వసూళ్లలో తగ్గుదల కనిపించలేదు. ప్రతి రోజూ క్రమంగా వసూళ్లు పెరిగిపోతుండటంతో ట్రేడ్ వర్గాలు కూడా ఆశ్చర్యపోతున్నాయి.
సోమవారం 3.8 కోట్ల నెట్ కలెక్షన్ వచ్చిన ఈ సినిమా, గురువారం నాటికి 5.9 కోట్ల మార్క్‌ను చేరుకుంది. అంటే వీక్ డేస్ లో కూడా దాని పరుగు ఆగలేదు. ఇప్పటివరకు హిందీ వెర్షన్‌లో ఈ చిత్రం 32.8 కోట్ల నెట్ వసూళ్లు సాధించిందంటే ఈ సినిమా స్థాయి ఏంటో అర్థం అవుతుంది.
ఇదంతా సాధించిందంటే, వీకెండ్‌లో ఎలాంటి కలెక్షన్లు వస్తాయో ఊహించుకోవచ్చు. శనివారం, ఆదివారం సెలవులు ఉండటంతో మరింత ఎక్కువ ఆదాయం వచ్చే అవకాశం ఉంది. ఇకపోతే ఈ రెండు రోజులు ఈ చిత్రానికి ఎంత లాభం తీసుకురాబోతున్నాయో అన్న ఆసక్తితో అందరూ చూస్తున్నారు.
