లోకనాయకుడు కమల్ హాసన్ చాలా కాలం తరువాత విక్రమ్‌ సినిమాతో సాలిడ్‌ కంబ్యాక్ అందుకున్నారు. ఈ సినిమాతో కమల్ హాసన్ కు భారీగా లాభాలు వచ్చాయి. ప్రస్తుతం కమల్ వరుస సినిమాలతో ఫుల్‌ బిజీగా ఉన్నారు. కమల్ శంకర్ కాంబోలో రాబోతున్న భారతీయుడు 2 విడుదలకు సిద్ధంగా వుంది .స్టార్ డైరెక్టర్ శంకర్ తెరకెక్కించిన ఈ సినిమా జూన్ 13 విడుదల కానున్నట్లు సమాచారం. ఈ సినిమా మాత్రమే కాకుండా కమల్ హాసన్ థగ్ లైఫ్, కల్కి 2898 AD లాంటి భారీ చిత్రాలలో కూడా యాక్ట్‌ చేస్తున్నారు.
ఇలాంటి సమయంలో లోకనాయకుడిపై నిర్మాతల మండలికి ఫిర్యాదు అందింది. ప్రముఖ నిర్మాతలు లింగుసామి, సుభాష్ చంద్రబోస్ ఈ ఫిర్యాదు చేశారు. 2015లో ఉత్తమ విలన్ చిత్రం కోసం కమల్ హాసన్, లింగుసామి, సుభాష్ కలిసి పని చేసారు.ఈ సినిమాకి రమేష్ అరవింద్ దర్శకత్వం వహించారు. భారీ అంచనాల మధ్య విడుదలైన ఈ సినిమా బాక్సాఫీస్ వద్ద మాత్రం డిజాస్టర్ గా నిలిచింది. దీంతో సినిమా ఫ్లాప్ అవ్వడంతో కమల్ వారితో మరో సినిమా చేసేందుకు ఒప్పందం కుదుర్చుకున్నారు.
30 కోట్ల బడ్జెట్‌తో మరో సినిమా చేసి గత సినిమా నష్టాన్ని భర్తీ చేస్తానని కమల్ వీరికి హామీ ఇచ్చినట్లు వారు పేర్కొన్నారు.అయితే హామీ ఇచ్చినప్పటికీ కూడా కమల్ హాసన్ తొమ్మిదేళ్లుగా తమతో ఎలాంటి సినిమా చేయలేదని వారు ఆరోపించినట్టు సమాచారం. తాను ఉత్తమ విలన్ సినిమాకు దర్శకత్వం వహించి ఉంటే ఆ సినిమా రిజల్ట్ వేరేలా ఉండేదని.. కానీ నిర్మాతగా మారినందువల్లే ఈ నష్టాలను భరించాల్సి వస్తుందని లింగుస్వామి అన్నారు.
ఈ సినిమా నష్టాలతో పాటు మరో సినిమా చేసేందుకు కమల్ ను చాలా సార్లు కలిశామని, కానీ ఆయన మాత్రం మరో సినిమా చేసేందుకు ముందుకు రావడం లేదని వివరించారు. దీంతో తప్పని పరిస్థితులలో కమల్ పై ఫిర్యాదు చేయాల్సి వచ్చిందని లింగుసామి తెలిపారు.
