ప్రభాస్‌ గతేడాది సలార్ సినిమాతో భారీ విజయాన్ని అందుకున్నాడు. దాని తరువాత నాగ్‌ అశ్విన్‌ దర్శకత్వం వహిస్తున్న ”కల్కి 2898 ఏడీ” అనే చిత్రంలో నటిస్తున్నాడు. ఇందులో దీపికా పడుకొణె హీరోయిన్‌ గా నటిస్తుంది. ఇందులో అసలైన విశేషం ఏంటంటే కమల్‌ హాసన్‌ ప్రతి నాయకునిగా నటిస్తున్నారు.
ఈ చిత్రం షూటింగ్‌ శరవేగంగా జరుగుతుంది. ఈ చిత్రానికి అశ్వినిదత్‌ నిర్మాతగా ఉన్నారు. భారీ బడ్జెట్ తో తెరకెక్కుతున్న ఈ చిత్ర విశేషాలు గురించి అడపాదడపా బయటకు వస్తూనే ఉన్నాయి. ప్రస్తుతం ఈ చిత్ర బృందం హీరో ప్రభాస్‌ తో పాటు, సెకండ్‌ హీరోయిన్‌ దిశాపటానీతో పాటు ఇటలీ లో సందడి చేస్తున్నారు.
ప్రభాస్‌, దిశా మధ్య ఓ ఫీల్‌ గుడ్‌ సాంగ్‌ ను చిత్రీకరించేందుకు చిత్ర బృందం మొత్తం ఇటలీకి వెళ్లింది. ఈ పాటే సినిమాలో చివరి సాంగ్‌ అని చిత్ర బృందం వెల్లడించింది. ఈ షూటింగ్‌ కు సంబంధించిన కొన్ని ఫొటోలను చిత్ర యూనిట్ అప్పుడప్పుడు సోషల్‌ మీడియాలో పంచుకుంటుంది. ఈ క్రమంలోనే గురువారం సినిమా యూనిట్ అంతా కలిసి ఉన్న ఓ ఫొటోను నిర్మాతలు షేర్‌ చేశారు.
అలాగే ఇటలీ వెళ్తున్నప్పుడు విమానంలో దిశా ప్రభాస్‌ ని తన మొబైల్‌ లో ఫొటో తీస్తున్న చిత్రాన్ని ఒకదానిని అభిమానులతో పంచుకున్నారు. ఈ క్రమంలోనే తాజాగా దిశా పటానీ, ప్రభాస్‌ ఓ సముద్రం పక్కగా ఉన్న చిత్రం ఒకటి చిత్ర యూనిట్ నుంచి బయటకు వచ్చింది. ఈ క్రమంలోనే శుక్రవారం శివరాత్రి పర్వదినాన్ని పురస్కరించుకుని చిత్ర యూనిట్ నుంచి ఏదైనా కీలక అప్డేట్ వచ్చే అవకాశాలున్నాయని ఇండస్ట్రీలో టాక్‌ వినిపిస్తుంది.
దీంతో ప్రభాస్‌ అభిమానులంతా ఎప్పుడెప్పుడు చిత్ర బృందం అప్డేట్ ఇస్తుందా అని ఎదురు చూస్తున్నారు. అయితే ఈ చిత్రం నుంచి ఇప్పటి వరకు కేవలం ఓ గ్లింప్‌ ను మాత్రమే చిత్ర బృందం రిలీజ్‌ చేసింది. ఆ గ్లింప్సే చిత్రం మీద పిచ్చ అంచనాలు క్రియేట్‌ చేసింది. గ్లింప్స్‌ నే ఈ రేంజ్‌ లో ఉంటే టీజర్‌ ఎలా ఉండబోతుందో అని ప్రేక్షకులు, అభిమానులు ఎదురు చూస్తున్నారు.
ఈ చిత్రాన్ని మే 9 న వరల్డ్‌ వైడ్‌ గా రిలీజ్‌ చేయడానికి చిత్ర బృందం సన్నాహాలు మొదలు పెట్టింది. ఈ సినిమాలో అమితాబ్‌ బచ్చన్‌ కూడా ఓ కీలక పాత్రలో నటిస్తున్నారు. ఇందులో రాజేంద్రప్రసాద్‌, పశుపతి, రాజమౌళి, రానా, దుల్కర్ సల్మాన్‌, విజయ్‌ దేవరకొండ, నాని, మృణాల్‌ ఠాకూర్‌ వంటి నటీనటులంతా కొన్ని కీలక పాత్రల్లో నటించబోతున్నట్లు సమాచారం.
