వైఎస్ భారతి పీఏ, నీచమైన అసభ్యమైన సోషల్ మీడియా పోస్టులు పెట్టడంలో మహామేధావి అయిన వర్రా రవీందర్ రెడ్డిని పోలీసులు అదుపులోకి తీసుకున్నారనే వార్తలు బయటకు రాగానే.. జగన్ దళాల్లో కంగారు, భయం మొదలైంది. జగన్ దళాల్లోని ప్రముఖులందరూ ఇప్పుడు బయటకు వస్తున్నారు. వర్రా రవీందర్ రెడ్డికి ఏమైనా అయితే జగన్మోహన్ రెడ్డిదే బాధ్యత లాంటి బెదిరింపు డైలాగులు చెబుతున్నారు. వర్రాను కాపాడడానికి ఆరాటపడుతున్నారు.
వర్రా రవీందర్ రెడ్డి కోసం పార్టీ మొత్తం ఇంతగా ఎందుకు ఆరాటపడుతున్నదా అంటే.. ఆయన వైఎస్ భారతి పిఏ కావడమే అందుకు కారణం అని విశ్లేషకులు భావిస్తున్నారు. వర్రా రవీందర్ రెడ్డి పోలీసు విచారణలో నోరు విప్పితే గనుక.. ఆయన పెట్టే అసభ్య పోస్టుల వెనుక వైఎస్ భారతి హస్తం, మార్గదర్శకత్వం కూడా బయటకు వస్తుందని… వైఎస్ భారతి మీద కూడా కేసులు నమోదు అయ్యే ప్రమాదం ఉన్నదని అందుకే జ గన్ దళాలు అంతగా కంగారు పడుతున్నాయని తెలుస్తోంది.
జగన్మోహన్ రెడ్డి పరిపాలన సాగినరోజుల్లో .. వారి అండ చూసుకుని అడ్డగోలుగా చెలరేగిపోయిన వారిలో వర్రా ఒకరు. తెలుగుదేశం, జనసేన పార్టీల నాయకులు, వారి కుటుంబసభ్యుల మీద మాత్రమే కాదు.. జగన్మోహన్ రెడ్డి తల్లి, చెల్లిపై కూడా అత్యంత అసభ్యమైన పోస్టులు పెట్టడం ద్వారా వర్రా చాలా కీర్తి సంపాదించుకున్నారు. తనమీద అసభ్యమైన పోస్టులు పెట్టారంటూ సాక్షాత్తూ జగన్ చెల్లెలు వైఎస్ షర్మిల పోలీసులకు ఫిర్యాదు చేస్తేనే అతీగతీ లేదు. వర్రా అప్పట్లో వైఎస్ భారతి పీఏ కావడం ఆయనకు పెద్ద రక్షణ కవచంలాగా పనిచేసింది. ప్రభుత్వం మారిన తర్వాత.. పరిస్థితి పెద్దగా మారలేదు. అదుపులోకి తీసుకున్న పోలీసులు 41ఏ నోటీసు ఇచ్చి వదిలేశారు. దానికి సంబంధించి ఎస్పీ సహా పలువురు పోలీసులపై వేటు పడింది. ఎంపీ అవినాష్ రెడ్డి స్వయంగా పోలీసులతో మాట్లాడి విడిపించినట్లుగా వార్తలు వచ్చాయి.
వర్రా రవీందర్ రెడ్డితో ఫోనులో మాట్లాడుతున్నారని సమాచారం రావడంతో పోలీసులు అవినాష్ పీఏ ఇంటికి కూడా వెళ్లారు. ఇప్పుడు మహబూబ్ నగర్ పరిసరాల్లో అదుపులోకి తీసుకున్న తరువాత.. అవినాష్ రెడ్డి తన కంగారును దాచుకోలేకపోతున్నారు. ఆయనను వెంటనే కోర్టులో హాజరు పరచాలని ఆయన డిమాండ్ చేశారు. పోలీసు స్టేషన్ కు తీసుకువెళ్లకుండా ఒక రాత్రంతా వర్రా రవిని వేధించారని, హింసించారని అవినాష్ రెడ్డి తనకు తోచినదెల్లా మాట్లాడుతున్నారు. వారి కంగారు చూస్తోంటే వర్రా ఎఫెక్ట్ పలువురు పెద్దతలకాయల పేర్లు బయటకు వస్తాయని అనిపిస్తోంది.
