నందమూరి నటసింహం బాలకృష్ణ తన కెరీర్‌ లో 109 వ సినిమా చేస్తున్న సంగతి తెలిసిందే. ఈ సినిమా బాబీ దర్శకత్వం లో రూపుదిద్దుకుంటుంది. ప్రస్తుతం షూటింగ్ దశలో ఉన్న ఈ మూవీ ఇటీవల లాంగ్ షెడ్యూల్ రాజస్థాన్ లో చేసేందుకు బయల్దేరి వెళ్లింది. ఈ షెడ్యూల్ లో ఎడారిలో పోరాట సన్నివేశాలను డైరెక్టర్‌ బాబీ తెరకెక్కించనున్నట్లు తెలుస్తుంది. బాలీవుడ్ నటుడు బాబీ డియోల్ ప్రతినాయకుడిగా చేస్తున్నాడు.
కాగా ఈ సినిమా రిలీజ్ ఎప్పుడు అనేది ప్రస్తుతం సస్పెన్స్ గా మారింది. తొలుత ఈ చిత్రానికి వినాయక చవితి కానుకగా విడుదల అవుతుందని అనుకుంటున్న తరుణంలో ఎన్నికల నేపథ్యంలో షూటింగ్ కు బ్రేక్ ఇచ్చారు బాలయ్య. దీంతో షూట్ వాయిదా పడుతూ వచ్చింది. అన్ని కార్యక్రమాలు ముగించుకొని ఇటీవల బాలయ్య షూటింగ్ లో అడుగు పెట్టిన సంగతి తెలిసిందే. ప్రస్తుతం వినిపిస్తున్న వార్తల ప్రకారం ఈ చిత్రాన్ని డిసెంబర్ 20న విడుదల చేయాలనీ మూవీ మేకర్స్ భావిస్తున్నట్టు ఇండస్ట్రీలో వినిపిస్తున్న టాక్‌.
అయితే దీని గురించి అఫీషియల్ క్లారిటీ రావాల్సి ఉంది. ఒకవేళ ఆ డేట్ కు వస్తే వారం గ్యాప్ లో అనగా 25న రానున్న శంకర్, రామ్ చరణ్ ల గేమ్ ఛేంజర్ నుండి గట్టి పోటీ ఏర్పడనుంది. వారం గ్యాప్ లో రావడం వలన కలెక్షన్లపై ప్రభావం పడే అవకాశం ఉంటుందని తెలుస్తుంది. వీటితో పాటు పుష్ప-2, కన్నప్ప కూడా డిసెంబర్ లోనే విడుదల కానున్నాయి. ప్రస్తుతం షూటింగ్ చివరి దశలో ఉన్న బాలయ్య, బాబీ చిత్రానికి ‘వీరమాస్’ అనే టైటిల్ పరిశీలనలో ఉంది.
