ఇటీవల విడుదల చేసిన ఐఎండీబీ జాబితాలో 13వ స్థానాన్ని సొంతం చేసుకోవడం చాలా ఆనందంగా ఉందని, తన కష్టానికి దక్కిన ప్రతిఫలం ఇది అని టాలీవుడ్‌ ముద్దుగుమ్మ సమంత తెలిపారు. కెరీర్‌ను ఇప్పుడే మొదలుపెట్టినట్లు అనిపిస్తుందని, అప్పుడే ఇన్నేళ్లు ఎలా గడిచిపోయాయో తనకే అర్థం కావట్లేదన్నారు. తనకు ప్రస్తుతం గొప్ప సినిమాల్లో అవకాశాలు వస్తున్నాయని, ఇకపై మరింత ఎక్కువ కష్టపడి పనిచేస్తానని సామ్ చెప్పుకొచ్చింది.
ఏ రంగంలో అయినా ఒకరితో మరొకరు పోల్చుకోవడం సహజం. నేను పక్కవారిని చూసి స్ఫూర్తి పొందుతాను. వారి విజయాలను చూసి ఈర్ష పడను, ఇంకా ఎక్కువ కష్టపడి పనిచేయాలనుకుంటాను. నేనెప్పుడూ పోటీని నెగెటివ్‌గా చూడను’ అంటూ సమంత తెలిపారు. సామ్ ప్రస్తుతం ‘మా ఇంటి బంగారం’లో నటిస్తున్నారు. సామ్ నిర్మాణ సంస్థ ‘ట్రాలాలా మూవింగ్‌ పిక్చర్స్‌’పై రూపొందుతున్న తొలి చిత్రం ఇదే.
ఐఎండీబీ జాబితాలో టాప్ 15లో ఉన్న ఏకైక దక్షిణాది స్టార్‌ గా సమంత ఉన్నారు. ఈ జాబితాలో దీపికా పడుకోణె అగ్రస్థానంలో ఉన్నారు. బాలీవుడ్‌ బాద్‌ షా షారుఖ్ ఖాన్ రెండో స్థానంలో ఉండగా.. నీలి కళ్ల సుందరి ఐశ్వర్య రాయ్ మూడో స్థానంలో ఉన్నారు. అలియా భట్, ఇర్ఫాన్ ఖాన్, అమీర్ ఖాన్, సుశాంత్ సింగ్ రాజ్‌పుత్, సల్మాన్ ఖాన్, హృతిక్ రోషన్, అక్షయ్ కుమార్ టాప్ 10లో ఉండగా… తెలుగు , తమిళం నుంచి తమన్నా భాటియా, నయనతార వరుసగా 16, 18వ స్థానాల్లో నిలిచారు.
