తమిళ స్టార్ హీరో విజయ్ ప్రత్యక్ష రాజకీయాల్లోకి అడుగుపెట్టిన విషయం తెలిసిందే. ‘తమిళగ వెట్రి కజగం’ అనే రాజకీయ పార్టీని ఆయన ఈ ఏడాది ఫిబ్రవరిలో స్థాపించారు. ఇక తాజాగా ఈ పార్టీకి సంబంధించిన జెండాను విజయ్ గురవారం ఆవిష్కరించారు. చెన్నైలో జరిగిన ఈ జెండా ఆవిష్కరణ కార్యక్రమంలో విజయ్ అభిమానులు పెద్ద సంఖ్యలో పాల్గొన్నారు.
ఎరుపు, పసుపు రంగులో ఉన్న జెండా మధ్యలో వాగాయ్ అనే జాతికి చెందిన పువ్వు ను ఏర్పాటు చేశారు. ఈ పుష్పాల‌ను విజ‌యానికి ప్ర‌తీక‌గా భావిస్తారు తమిళ ప్ర‌జ‌లు. పక్కన రెండు ఏనుగులు ఇరువైపులా ఉన్నాయి. ఈ జెండాను ఆవిష్కరించిన విజయ్, రాబోయే రోజుల్లో దేశమంతా తమ పార్టీ జెండా రెపరెపలాడుతుందని అని పేర్కొన్నారు. ఇకపై తమిళనాడు గొప్ప మార్పును చూస్తుందని పేర్కొన్నారు. ఈ సందర్భంగా పార్టీ అధికారిక గీతాన్ని కూడా ఆయన అభిమానుల ముందుకు తీసుకుని వచ్చారు.
ఈ కార్యక్రమంలో విజయ్ తల్లిదండ్రులతో పాటు అభిమానులు పెద్ద ఎత్తున పాల్గొన్నారు. ఇక విజయ్ రాజకీయాల్లో అడుగు పెట్టడంతో ప్రస్తుతం అందరి చూపులు ఇప్పుడు విజయ్ పై ఉన్నాయి. రాబోయే అసెంబ్లీ ఎన్నికల్లో తమిళనాడులోని అన్నిస్థానాల్లో తమ పార్టీ సొంతంగా పోటీ చేయబోతుందని విజయ్త ఎప్పుడో ప్రకటించారు. పార్టీకి సంబంధించిన మరిన్ని వివరాలను త్వరలోనే ఓ సమావేశం ఏర్పాటు చేసి అందులో వివరిస్తామని విజయ్ పేర్కొన్నారు.
