టాలీవుడ్‌ సూపర్ స్టార్ మహేష్ బాబు త్రివిక్రమ్ తో కలిసి చేసిన గుంటూరు కారం సినిమా మిశ్రమ స్పందన అందుకున్న విషయం తెలిసిందే. ఆ సినిమా తర్వాత రాజమౌళి దర్శకత్వంలో మహేష్ బాబు తన 29వ సినిమా చేయబోతున్నాడు. ఈ సినిమాకి సంబంధించిన అధికారిక ప్రకటన కూడా పూర్తిస్థాయిలో ఇప్పటి వరకు రాలేదు. కేవలం రాజమౌళి దర్శకత్వంలో మహేష్ బాబు హీరోగా కేఎల్ నారాయణ నిర్మాణంలో దుర్గా ఆర్ట్స్ బ్యానర్ మీద ఒక సినిమా తెరకెక్కబోతోంది అని వార్త మాత్రమే చిత్ర బృందం నుంచి బయటకు వచ్చింది.
ఈ సినిమాకి కథ అందించే విజయేంద్ర ప్రసాద్ మాత్రమే సినిమా గురించి పలుచోట్ల అనేక సందర్భాలలో కామెంట్లు చేశారు. కానీ రాజమౌళి నోటి నుంచి రాకుండా ఏది అధికారికం కాదనే విషయం తెలిసిందే. ఈ నేపథ్యంలోనే మరికొద్ది రోజుల్లో రాబోతున్న మహేష్ బాబు పుట్టినరోజు ఆగస్టు 9వ తేదీన ఈ సినిమాకి సంబంధించిన అధికారిక ప్రకటన కానీ లేదా సినిమాకి సంబంధించిన ఏదో ఒక విషయం కానీ రాజమౌళి ప్రకటించే అవకాశాలు కనిపిస్తున్నాయి. ఈ విషయం గురించి కొద్ది రోజుల నుంచి పెద్ద ఎత్తున ప్రచారం జరిగింది.
అయితే మహేష్ బాబు అభిమానులందరూ నిరాశపడే విధంగా ఇప్పుడు ఇండస్ట్రీ వర్గాల నుంచి ఒక షాకింగ్ విషయం బయటకు వచ్చింది. అదేమంటే ఈసారి మహేష్ బాబు పుట్టినరోజు సందర్భంగా ఈ సినిమాకి సంబంధించిన ఎలాంటి అప్డేట్ బయటకు రావడం లేదని సమాచారం. కాబట్టి మహేష్ బాబు అభిమానులు ఎక్కువ ఆశలు పెట్టేసుకొని సినిమా నుంచి అప్డేట్ వస్తుందని రెడీగా ఉంటే మాత్రం నిరాశ పడక తప్పదని తెలుస్తుంది.
