పవన్ కళ్యాణ్ అభిమానులు ఎన్నాళ్లుగానో ఎదురు చూస్తున్న “హరిహర వీరమల్లు” సినిమా ఎట్టకేలకు థియేటర్లలోకి అడుగుపెట్టేందుకు రెడీ అయింది. ఈసారి ఆయన పూర్తిగా కొత్త కథతో ప్రేక్షకుల ముందుకొస్తుండటం విశేషం. గతంలో ఎక్కువగా రీమేక్ సినిమాలతోనే పవన్ స్క్రీన్ మీద కనిపించిన విషయం తెలిసిందే. అలాంటి తరుణంలో ఇది ఒరిజినల్ కథతో వస్తున్న సినిమా కావడంతో అంచనాలు ఊపందుకున్నాయి.
ఇక ఈ సినిమా ఎప్పుడో విడుదలై ఉండాల్సింది. కానీ కొన్ని కారణాల వల్ల ఆలస్యం అయ్యింది. అనుకున్న సమయానికి వచ్చి ఉంటే, బాక్సాఫీస్ దగ్గర మొదటి రోజు నుంచే మరింత ఊపు కనిపించేదని విశ్లేషకులు చెబుతున్నారు. అయినా ఈ ఆలస్యం పవన్ ఫ్యాన్స్ ఉత్సాహాన్ని మాత్రం తగ్గించలేదు.
పవన్ కళ్యాణ్ సినిమాలు హిట్ అయిన తర్వాత పెద్దగా సెలబ్రేషన్లకు వెళ్లే స్వభావం ఉండదట. కానీ “భీమ్లా నాయక్” సినిమా విషయంలో మాత్రం ఒక్కసారి పార్టీలో పాల్గొన్నట్లు ఆయన వెల్లడించారు. తక్కువ టికెట్ ధర ఉన్నప్పటికీ ఆ సినిమా మంచి కలెక్షన్లు అందుకోవడంతో టీం పార్టీ పెట్టింది. ఆ సమయంలో పవన్ కూడా హాజరయ్యారు. అలా ఆయన మాటల ప్రకారం, భీమ్లా నాయక్ విజయం ప్రత్యేకమైనదిగా చెప్పుకోవచ్చు.
ఇప్పుడు “హరిహర వీరమల్లు” సినిమా కూడా అదే స్థాయిలో గెలుపు సాధిస్తుందా అన్నది ఆసక్తికరంగా మారింది. ఇప్పటికే ఈ సినిమా పాన్ ఇండియా స్థాయిలో ప్రీమియర్లు జరుగుతున్నాయి. రేపటి నుంచి పూర్తిస్థాయిలో థియేటర్లలో సందడి చేయనుంది. అభిమానులే కాదు, సినిమా వర్గాలు కూడా ఈ మూవీపై మంచి విశ్వాసంతో ఉన్నాయంటే, ఓ మంచి విజయం దిశగా అడుగులు పడుతున్నట్లు అనిపిస్తోంది.
