మాస్ కా దాస్ విశ్వక్ సేన్ నటిస్తున్న తాజా సినిమా ‘లైలా’ ప్రేమికుల రోజు కానుకగా ఫిబ్రవరి 14న గ్రాండ్ విడుదలకు సిద్ధంగా ఉంది. రామ్ నారాయణ్ దర్శకత్వంలో సాహు గారపాటి నిర్మించిన ఈ సినిమా ప్రీ రిలీజ్ ఈవెంట్ హైదరాబాద్ లో ఏర్పాటు చేశారు. ముఖ్య అతిథిగా మెగాస్టార్ చిరంజీవి విచ్చేశారు. ఈ కార్యక్రమంలో మెగాస్టార్ మాట్లాడుతూ.. ‘మొన్న ఓ ఈవెంట్ లో అడిగిన ప్రశ్నకు ‘విశ్వక్ సేన్’ అదిరిపోయే అన్సర్‌ ఇచ్చాడు. మీరు బాలకృష్ణ కాంపౌండ్ కదా… మరి చిరంజీవి వైపు వచ్చారేంటి అని ప్రశ్నిస్తే… మా ఇంటికి కాంపౌండ్ ఉంది కానీ, ఫిలిం ఇండస్ట్రీకి కాంపౌడ్ లేదు అని చక్కగా బదులిచ్చాడు’ అని చిరు అన్నారు.
మెగాస్టార్ ఇంకా మాట్లాడుతూ.. ‘విశ్వక్ సేన్ ఆ విధంగా సమాధానం చెప్పినందుకు అభినందిస్తున్నాను. మనుషులన్నాక వేరే వాళ్లపై అభిమానం, ప్రేమ ఉండకూడదా? నాపై ఆప్యాయత, అనురాగం ఉండకూడదా?, అంతేందుకు మా ఇంట్లోనే మా అబ్బాయి చరణ్‌ కి సూర్య అంటే చాలా ఇష్టం. అన్నంత మాత్రనా వాడి కార్యక్రమానికి నేను వెళ్లకూడదా, వాడితో కలిసి ఉండొద్దా, వాడితో కలిసి భోంచేయోద్దా ?, సినిమా వాళ్ళు బాగానే ఉంటారు కానీ, అభిమానులు కొట్టుకుచస్తారని అర్థమైంది. నేను హీరోని అయ్యాక హీరోల మధ్య సఖ్యత, సుహృద్భావ వాతావరణం ఉండాలనే కోరుకున్నాను’ అంటూ అన్నారు.
