అదానీ నుంచి 1750 కోట్ల రూపాయలు జగన్ ముడుపులు తీసుకున్నారనే వ్యవహారంపై ఆయన తప్ప.. వైఎస్సార్ కాంగ్రెస్ లోని నాయకులంతా రకరకాలుగా సమర్థించుకుంటున్నారు. అప్పట్లో విద్యుత్తు శాఖ మంత్రిగా పనిచేసిన బాలినేని శ్రీనివాసరెడ్డి- జరిగిన అసలు వాస్తవాల్ని వెల్లడించారు. తనకు అర్ధరాత్రి ఫోను చేసి ఫైలుమీద సంతకం పెట్టమని అడిగారని, తాను తిరస్కరించిన తర్వాత.. కేబినెట్ కు పంపమంటే పంపేశానని, కేబినెట్ తీర్మానంతో ఒప్పందం కుదుర్చుకున్నారని, తన ప్రమేయం లేకుండానే మొత్తం జరిగిందని బాలినేని వెల్లడించిన సంగతి అందరికీ తెలుసు. అయితే బాలినేనికి కౌంటరు ఇవ్వడానికి వైఎస్సార్ కాంగ్రెస్ పార్టీలో ఎవ్వరికీ ధైర్యం చాలలేదు. అయితే బాలినేనితో ఎన్నికల నాటి పాతవైరం ఉన్నటువంటి చెవిరెడ్డి భాస్కరరెడ్డి మాత్రం.. ఆయనను కెలికి ఇప్పుడు మరింతగా రచ్చకెక్కారు.
బాలినేని శ్రీనివాసరెడ్డి అబద్ధాలు చెబుతున్నారని చెవిరెడ్డి ఆరోపించారు. సెకితో ఒప్పందం కుదుర్చుకున్న ఫైలు మీద బాలినేని సంతకం పెట్టారని ఆయన చెప్పుకొచ్చారు. చంద్రబాబునాయుడును ప్రసన్నం చేసుకోవడానికే బాలినేని ఇలా అబద్ధాలు మాట్లాడుతున్నట్టుగా చెవిరెడ్డి ఆరోపిస్తున్నారు.
ఈ మాటల ద్వారా బాలినేని ని చెవిరెడ్డి కెలికినట్టయింది. దీనికి ప్రతిస్పందనగా బాలినేని శ్రీనివాసరెడ్డి ఒక రేంజిలో ఫైర్ అయ్యారు. కేబినెట్ కు ఫైల్ పంపినట్టు తానే చెప్పాను కదా.. తన సంతకం లేకుండా కేబినెట్ కు వెళ్లదు కదా.. తన డిజిటల్ సంతకంతోనే వెళ్లింది.. అయితే ఒప్పందంలో తన పాత్ర లేదు.. అని ఆయన చెబుతున్నారు. చెవిరెడ్డికి దమ్ముంటే బహిరంగ చర్చకు రావాలని.. ప్రజల ఎదుట వాస్తవాలను తేల్చుకుందాం అని బాలినేని సవాలు విసురుతున్నారు.
చెవిరెడ్డి అమెరికాకు వెళ్లి ఏమేం చేస్తున్నారో సకలం తనకు తెలుసునంటూ ఫైర్ అవుతున్నారు. నిజానికి బాలినేని పట్ల చెవిరెడ్డికి శత్రుభావం ఉంది. చెవిరెడ్డిని ఒంగోలు ఎంపీగా పోటీచేయించడాన్ని అప్పట్లో వైసీపీలో ఉన్న బాలినేని తీవ్రంగా వ్యతిరేకించారు. ఒంగోలు టికెట్ మాగుంట శ్రీనివాసులరెడ్డికి ఇవ్వకపోతే.. ఎంపీ సీటుతో పాటు ఎమ్మెల్యే సీట్లు కూడా కోల్పోతాం అంటూ జగన్ కు నచ్చజెప్పే ప్రయత్నం చేశారు. ఆయన మాట వినకుండా జగన్ చెవిరెడ్డికే టికెట్ ఇవ్వడం.. అందరూ మూకుమ్మడిగా ఓడిపోవడం జరిగింది. అప్పటినుంచి బాలినేని అంటే వైరభావం ఉన్న చెవిరెడ్డి .. ఈ సందర్భాన్ని వాడుకుని.. బాలినేనిపై విమర్శలు చేస్తున్నట్టుగా కనిపిస్తోంది.
