వైఎస్సార్ కాంగ్రెస్ పార్టీకి చెందిన నాయకుడు, రౌడీషీటర్ బోరుగడ్డ అనిల్ కుమార్ ను పోలీసులు రెండు రోజులకిందట అరెస్టు చేసిన సంగతి తెలిసిందే. అయితే అనిల్ పోలీసుల వద్ద అనేక కీలక విషయాలు బయటపెట్టినట్టుగా వార్తలు వస్తున్నాయి. ఆ సమాచారాన్ని క్రోడీకరిస్తే గనుక.. వైసీపీలో చక్రం తిప్పుతున్న పలువురు పెద్దలు కటకటాల వెనక్కు వెళ్లే అవకాశం ఉన్నదని ప్రజలు భావిస్తున్నారు. ఇప్పటికే తెలుగుదేశం పార్టీ ఆఫీసు మీద దాడి తదితర కేసుల్లో ఇరుక్కుని ఉన్న ఆ నాయకులు బోరుగడ్డ అనిల్ వాంగ్మూలాన్ని కూడా పోలీసులు పరిగణించినట్లయితే మరిన్ని ఇక్కట్ల పాలవ్వాల్సిందేనని అంతా అనుకుంటున్నారు.
వైసీపీ హయాంలో తెలుగుదేశం, జనసేన అధినేతలను విచ్చలవిడిగా బూతులు తిడుతూ రౌడీషీటర్ బోరుగడ్డ అనిల్ కుమార్ పాపులర్ అయ్యారు. అప్పట్లో ఆయన మీద కేసులు కూడా నమోదైనప్పటికీ.. అధికారంలో ఉన్నది ఆయనను కాపాడుతున్న పార్టీనే గనుక.. చర్యలు తీసుకోవడం గురించి పోలీసులు ఎన్నడూ పట్టించుకోలేదు. దాంతో బోరుగడ్డ అనిల్ మరింత విచ్చలవిడిగా చెలరేగుతూ వచ్చారు. రాష్ట్రంలో అధికారం మారిన తర్వాత అనిల్ పరారయ్యారు. ఇన్నాళ్లు అజ్ఞాతంలో ఉండి గుంటూరుకు వచ్చిన సందర్భంలో రెండు రోజుల కిందట పోలీసులు అరెస్టు చేశారు. కాగా గురువారం విచారణలో పలు సంచలన విషయాలు వెల్లడించినట్టుగా తెలుస్తోంది.
ప్రధానంగా వైఎస్సార్ కాంగ్రెస్ పార్టీ ప్రధాన కార్యదర్శి సజ్జల రామక్రిష్ణా రెడ్డి, లేళ్ల అప్పిరెడ్డి పేర్లను వారితో ముడిపడిన అనేక వ్యవహారాల గురించి బోరుగడ్డ పోలీసులకు సమాచారం ఇచ్చినట్టుగా తెలుస్తోంది. ఏయే అగ్ర నాయకుల పేర్లను ఏయే ఘటనలతో ముడిపెట్టి చెప్పి ఉంటారోననే చర్చ ఇప్పుడు పార్టీలోనే జరుగుతోంది.
కేవలం వాంగ్మూలంలో చెప్పిన సంగతులు మాత్రమే కాకుండా.. అనిల్ కుమార్ ఇంట్లో సోదాలు నిర్వహించిన పోలీసులు కొన్ని పత్రాలతో పాటు, సెల్ ఫోన్, ల్యాప్ టాప్ లను స్వాధీనం చేసుకున్నారు. డేటా రికవరీ కోసం వాటిని ఫోరెన్సిక్ ల్యాబ్ కు పంపారు. ఆయనకు ఎవరెవరు ఏయే సందర్భాల్లో ఏయే ఘటనలు జరిగిన సమయాల్లో ఫోన్లు చేశారో.. సమస్త వివరాలు డేటా రికవరీతో బయటకు వచ్చే అవకాశం ఉంది. బోరుగడ్డ అనిల్ కుమార్ మీద ఇంకా అనేక కేసులు నమోదై ఉన్నాయి. అవన్నీ ఎప్పటికి తేలుతాయో గానీ.. అనిల్ పోలీసులకు దొరకడం, విచారణలో అనేక వాస్తవాలు వెల్లడిస్తుండడం అనేది.. వైఎస్సార్ కాంగ్రెస్ లోని పలువురు పెద్దనేతలకు గుబులుపుట్టిస్తున్నట్టుగా తెలుస్తోంది.
