ముఖ్యమంత్రి జగన్మోహన్ రెడ్డి స్క్రిప్టు లేకుండా ఒక్కమాట కూడా మాట్లాడలేరు అనే సంగతి.. ఆయన ప్రసంగాలను గమనించే ప్రతి ఒక్కరికీ తెలుసు. ఒక్క మాట మాట్లాడాలంటే.. పది సార్లు, పోడియం మీద పెట్టుకున్న స్క్రిప్టు కాగితాలను చూస్తూ ఆయన మాట్లాడుతుంటారు. తనకు స్క్రిప్టు రాసి యిచ్చే ‘అయినవాళ్లు’ ఏయే మాటలు వాడారో.. అవే మాటలను యథాతథంగా పలకాలని జగన్ ఆరాటపడుతుంటారు. అయితే తాజాగా బాపట్ల జిల్లాలో జరిగిన సిద్ధం సభలో జగన్ ప్రసంగాన్ని గమనిస్తే.. పరిపాలనలో మాత్రమే కాదు.. ఆయన మాటల్లో కూడా క్లారిటీలేదనే సంగతి మనకు అర్థమవుతుంది. ఒకమాటను మరోమాట కాంట్రడిక్ట్ చేస్తూ.. పరస్పర విరుద్ధంగా ఆయన మాటలు సాగిపోతున్నాయి. 

చంద్రబాబునాయుడు గెలిస్తే తన ప్రభుత్వం అమలు చేస్తున్న పథకాలు అన్నీ కూడా ఆగిపోతాయని జగన్ తొలినుంచి ఒక విషప్రచారాన్ని సాగిస్తూ వస్తున్నారు. అలా చెప్పడం వల్ల ఇక చంద్రబాబుకు ఓట్లు పడవు అనేది ఆయన నమ్మకం. మరొకవైపు  చంద్రబాబు మాత్రం.. ఇప్పుడున్న అన్ని పథకాలను కొనసాగించడంతో పాటు, అర్హులందరికీ కూడా అందేలా చూస్తాం అని స్పష్టంగానే చెబుతున్నారు. కానీ బాబు గెలిస్తే అన్నీ ఆగిపోతాయని చెప్పడం ద్వారా ప్రజల్లో భయం పుట్టించడమే జగన్ టార్గెట్ గా ఆయన మాటలు ఉంటుంటాయి. మేదరమిట్ట సిద్ధం సభలో కూడా జగన్ ఇవే ఆరోపణల్ని రిపీట్ చేశారు. చంద్రబాబుకు ఓటు వేయడం అంటే.. పథకాల రద్దుకు ఓటేయడమే అంటూ సెలవిచ్చారు. అంతలోనే ఆ మాటలనే కాంట్రడిక్ట్ చేస్తున్నట్టుగా.. మనం అమలు చేస్తున్న 8 పథకాలను ఎవ్వరూ టచ్ చేయలేరు.. ఎవరైనా అమలు చేయాల్సిందే అంటూ మరో మాట కూడా సెలవిచ్చారు. చంద్రబాబు మీద వేస్తున్న నిందకు విరుద్ధంగా ఉన్న ఈ ప్రకటనే, తెలుగుదేశానికి మేలు చేసేలా ఉన్నది. 

ఎందుకంటే.. జగన్ మాటలు నిజమే అనుకుంటే.. ఆయన అమలు చేస్తున్న 8 పథకాలను  కొత్తగా ఏ ప్రభుత్వం ఏర్పడినా అమలు చేసే తీరాల్సిన వాతావరణమే ఉన్నదని అనుకుందాం. అలాంటప్పుడు ఇక జగన్ ఎందుకు? ఆ పథకాలు ఎటూ కొనసాగుతాయి కదా. ఆ పథకాలు మంచివే అనుకుంటే.. వాటిని కొనసాగించడంతో పాటు రాష్ట్ర విధ్వంసానికి పాల్పడకుండా, రాష్ట్ర అభివృద్ధికి కూడా కష్టపడే చంద్రబాబును గెలిపించడం మంచిది కదా అనే అభిప్రాయం ప్రజల్లో ఏర్పడుతోంది. 
జగన్ పథకాలు తప్ప.. రాష్ట్ర ప్రగతిని పక్కనపెట్టేశారు. అలాంటప్పుడు పథకాలతో పాటు ప్రగతిని కూడా చూపించే బాబు పాలన వైపు ప్రజలు మొగ్గడంలో ఆశ్చర్యం లేదు. అందుకే జగన్ మాటలను జాగ్రత్తగా అర్థం చేసుకున్న వారు.. చంద్రబాబుకు ఓటేయాలనే అనుకుంటారని విశ్లేషకులు అంటున్నారు. 

తెలుగుదేశం పార్టీతో భారతీయ జనతా పార్టీ ఎన్నికల పొత్తులు కుదిరాయి. 2014 లో ఏ మాయాజాలం ప్రదర్శించి ఈ మూడు పార్టీలు కలిసి పోటీచేసి అధికారంలోకి వచ్చాయో.. ఇప్పుడు అదే మ్యాజిక్ రిపీట్ కానుంది. ప్రభుత్వ వ్యతిరేక ఓటు చీలనివ్వరాదని, జగన్మోహన్ రెడ్డి అరాచక పాలనను అంతమొందించాలని పవన్ కల్యాణ్ సంకల్పం, కేంద్రంతో సత్సంబంధాలు ఉంటే తప్ప రాష్ట్రాన్ని అభివృద్ధి పథంలో ముందుకు తీసుకువెళ్లడం సాధ్యం కాదని చంద్రబాబునాయుడు దూరాలోచన కలిసి బిజెపితో పొత్తులకు వారిని ప్రేరేపించాయి. ఈసారి ఎన్డీయే తరఫున జాతీయ స్థాయిలో 400 పైచిలుకు సీట్లు సాధించి ఘనంగా మూడోసారి అధికారంలోకి రావాలని భావిస్తున్న మోడీదళం కూడా అందుకు ఓకే అనడంతో పొత్తులు కుదిరాయి. ఏపీలో జగన్ పాలనకు భరతవాక్యం పలకాలని ఆరాటపడుతున్న ప్రతి ఒక్కరికీ కూడా ఈ పొత్తులు పెద్ద శుభ సంకేతంగా కనిపిస్తున్నాయి. 
అయితే ఈ మూడు పార్టీల పొత్తులు కుదరకుండా ఉండేందుకు తమ శతవిధాల ప్రయత్నించిన శక్తులు కొన్ని ఉన్నాయి.

ప్రధానంగా భారతీయ జనతా పార్టీ తెలుగుదేశంతో కలవకూడదని వారు కోరుకున్నారు. అందుకు అనుకూలంగా పార్టీలో తమకు ఉన్న పాబల్యాన్ని ఉపయోగించడానికి ప్రయత్నించారు. అలాంటి వారిలో ఏపీ భాజపా మాజీ అధ్యక్షుడు సోము వీర్రాజు, ఆ పార్టీ నాయకుడు విష్ణువర్దన్ రెడ్డి తదితరులు ముందువరుసలో ఉంటారు. తెలుగుదేశంతో కలిసి పొత్తు పెట్టుకోవడం అనేది వీరికి ఇష్టం లేదు. అందుకు రకరకాల సాకులు చెబుతూ వచ్చారు. సొంతంగా పోటీచేస్తే.. పార్టీ చాలా బలపడుతుందని.. వచ్చే ఎన్నికల నాటికి పూర్తిగా తామే సొంతంగా అధికారంలోకి వచ్చే పరిస్థితి వస్తుందని ఇలా అనేక మాయమాటలు ప్రయోగించారు. 
సోము వీర్రాజు లాంటివాళ్లు పార్టీ జాతీయ కమిటీలో తమకు ఉన్న హోదాలను పురస్కరించుకుని ఏపీ ప్రజలను తప్పుదారి పట్టించడానికి కూడా ప్రయత్నించారు. ఏపీలో బిజెపి 175 ఎమ్మెల్యే స్థానాలకు, 25 ఎంపీ స్థానాలకు పూర్తిగా ఒంటరిగానే పోటీచేయబోతున్నదని, ఈ మేరకు అధిష్ఠానం పెద్దల నుంచి తనకు స్పష్టమైన సమాచారం ఉన్నదని ఆయన ప్రకటనలు చేశారు. తద్వారా పొత్తు ఉంటే బెటర్ అనుకుంటున్న ఏపీ బిజెపి నాయకుల్లో అయోమయం సృష్టించడానికి కూడా ఆయన ప్రయత్నించారు. 

ఇలాంటి నాయకులకు కనీస నైతిక విలువలు ఉంటే.. ఇప్పుడు పొత్తు కుదిరిన ఎన్నికల్లో పోటీచేయకుండా దూరంగా ఉండాలని కమలదళం నేతలు భావిస్తున్నారు. సోము వీర్రాజు ఎంపీగా పోటీచేయాలని కోరుకుంటున్నట్టుగా వార్తలు వస్తున్నాయి. నిన్నటిదాకా పొత్తులను ఛీత్కరించిన నేత, ఇప్పుడు తగుదునమ్మా అంటూ తెలుగుదేశం జెండాలు పట్టుకుని వారి ఓట్లమీద ఎంపీగా నెగ్గడానికి ఎలా సిద్ధపడతారనే ప్రశ్నలు వినిపిస్తున్నాయి. మరి పొత్తులను వ్యతిరేకించిన కమలనేతలు తమ నైతికతను ఎలా నిరూపించుకుంటారో చూడాలి. 

ప్రియమైన వాళ్లకు మనం కూడా బిరుదులు ఇచ్చుకుంటూ ఉంటాం. లేదా మనకు ప్రియమైన వారిని ముద్దుపేర్లతో పిలుచుకుంటూ ఉంటాం. ఇంట్లో వాళ్లనైతే అంటే బిడ్డల్ని, అన్నల్ని, చెల్లెళ్లని ఇంకా ప్రేమతో ముద్దుపేర్లతోనే వ్యవహరిస్తూ ఉంటాం. మరి మన ఏపీ  ముఖ్యమంత్రి జగన్మోహన్ రెడ్డికి కూడా అలాంటి ముద్దుపేర్లు ఏవో ఉండే ఉంటాయి కదా. ఆ ముద్దుపేర్లు ఏమిటో చెప్పగలిగిన వాళ్లు ఆయన చెల్లెలి కంటె బెటర్ గా ఎవరుంటారు? ఇప్పుడు ఆయన చెల్లెలు వైఎస్ షర్మిల జగన్ ముద్దుపేర్లను బయటపెట్టేశారు. జగన్ అంటే ‘‘420, కేడీ’’ అని షర్మిల అన్నారు. ప్రజల్ని మోసగించిన వారిని ఇంతకంటె మరోలా ఎలా అనగలం అని కూడా షర్మిల తాను, అన్నయ్యకు పెట్టిన ముద్దుపేర్లను సమర్థించుకున్నారు. 

జగన్ విజయానికి 2019 ఎన్నికల్లో తీవ్రంగా పరిశ్రమించినప్పటికీ, అధికారంలోకి వచ్చిన తర్వాత జగన్ దూరం పెట్టడంతో విభేదాలు పెంచుకున్న షర్మిల తొలుత తెలంగాణలో సొంత రాజకీయ పార్టీ ప్రారంభించి కొన్నాళ్లు కష్టపడ్డారు. తర్వాత పార్టీని కాంగ్రెసులో విలీనం చేసి.. ఏపీలో పీసీసీ సారథ్య బాధ్యతలు స్వీకరించారు. ఆనాటినుంచి జగన్ పాలనలోని వైఫల్యాల గురించి.. జగన్ మాట తప్పిన తీరుల గురించి నిశిత విమర్శలతో ఆమె విరుచుకుపడుతున్న సంగతి అందరికీ తెలిసిందే. 
ప్రత్యేకించి.. ఏపీకి ప్రత్యేకహోదా సాధించే విషయంలో జగన్ ఎలా మాట తప్పారో, ఏ రకంగా తెలుగు ప్రజలను మోసం చేశారో.. ఎలా మోడీ ఎదుట సాగిలపడ్డారో షర్మిల చాలా విపులంగా ప్రజలకు చెబుతున్నారు. ఆ క్రమంలో భాగంగా ప్రత్యేకహోదా సాధన కోసం తిరుపతిలో ఓ భారీ బహిరంగ సభ కూడా నిర్వహించిన షర్మిల జగన్ హోదా విషయంలో మడమ తిప్పడం గురించి తూర్పార పట్టారు. 

తాజాగా ఆమె భాజపాను, జగన్ ను కలిపి తీవ్రంగా విమర్శించడం విశేషం. ఒక్క ఎంపీ, ఒక్క ఎమ్మెల్యే కూడా లేకపోయినప్పటికీ బిజెపి ఏపీ వ్యవహారాలను శాసిస్తున్నదని అన్నారు. జగన్మోహన్ రెడ్డి , ఆయన పార్టీలోని పెద్దలు బిజెపికి బానిసలుగా మారిపోయారని విమర్శిస్తున్న ఆమె, అంతటితో ఆగకుండా, రాష్ట్ర ప్రజలందరినీ కూడా బిజెపికి బానిసలను చేయడానికి జగన్ కంకణం కట్టుకున్నారని విమర్శించడం గమనార్హం. భాజపాతో అక్రమ పొత్తు కలిగిఉన్నందునే మణిపూర్ లో క్రైస్తవులపై విచ్చలవిడిగా దాడులు జరిగితే జగన్ చూస్తూ మిన్నకుండిపోయారని అనడం ద్వారా.. జగన్ కు బలం ఉన్న క్రైస్తవవర్గంలో కూడా కొత్త ఆలోచన రేకెత్తించేందుకు షర్మిల ప్రయత్నిస్తున్నట్టుగా కనిపిస్తోంది.