కోలీవుడ్‌ అగ్రహీరోలలో ఒకరిగా ఉన్న ధనుష్…బాలీవుడ్‌, హాలీవుడ్‌ సినిమాల్లో కూడా నటించి మెప్పించాడు. తాజాగా ధనుష్ 50వ సినిమా, స్వయంగా దర్శకత్వం వహించి నటించిన రాయన్ గత జులైలో విడుదలైన సంగతి తెలిసిందే. ఈ సినిమా బాక్సాఫీస్ కలెక్షన్లతో సూపర్ హిట్ అయ్యింది. ఆ తర్వాత ధనుష్ ప్రముఖ నిర్మాణ సంస్థల నుంచి అడ్వాన్స్ డబ్బులు తీసుకుని వారి సినిమాల్లో నటించకుండా అడ్వాన్స్ డబ్బులు తిరిగి ఇవ్వలేదన్న ఫిర్యాదు తెరమీదకు వచ్చింది. దీంతో తమిళ ఫిల్మ్ ప్రొడ్యూసర్స్ అసోసియేషన్ ధనుష్‌పై నిషేధం విధించింది.
దీంతో ధనుష్‌ని తమ సినిమాల్లో కమిట్ చేసే ముందు నిర్మాతల సంఘంతో సంప్రదింపులు జరపాలని నిర్ణయించుకున్నారు. ఇదిలా ఉంటే తను ఇప్పటికే కమిట్ అయిన సినిమాలతో పాటు తను దర్శకత్వం వహిస్తున్న ‘నిలుకు ఎన్ మేల్ ఎన్నడి గోబం’ సినిమా పనుల్లో ఫుల్‌ బిజీగా ఉన్నాడు. తనపై విధించిన నిషేధానికి సంబంధించి ధనుష్ కొన్ని కీలక నిర్ణయాలు తీసుకున్నట్లు తెలుస్తుంది. సమాచారం ప్రకారం, ధనుష్ 2 షరతులకు అంగీకరించాడు.
అవి ప్రముఖ నిర్మాణ సంస్థ తేనాండాల్ ఫిల్మ్స్ నిర్మించే చిత్రంలో నటించడం కాగా.. మరొకటి ఫైవ్ స్టార్ క్రియేషన్స్ నుండి వచ్చిన అడ్వాన్స్ మొత్తాన్ని వడ్డీతో సహా తిరిగి చెల్లించడం. ఈ రెండు షరతుల నేపథ్యంలో ధనుష్‌పై విధించిన నిషేధాన్ని ఎత్తివేయాలని నిర్మాతల సంఘం అనుకుంది. అంతకుముందు, గత జులైలో తమిళ చిత్ర నిర్మాతల సంఘం విడుదల చేసిన ఓ ప్రకటనలో, ధనుష్ అనేక మంది నిర్మాతల నుండి అడ్వాన్స్‌లు అందుకున్న దృష్ట్యా, నిర్మాతలు ఏదైనా కొత్త చిత్రాలను ప్రారంభించే ముందు తమిళ చిత్ర నిర్మాతల సంఘాన్ని సంప్రదించవలసిందిగా తెలిపింది..
