బాలయ్యతో వెంకీమామ..! నందమూరి బాలకృష్ణ వ్యాఖ్యాతగా చేస్తున్న ‘అన్‌స్టాపబుల్’ టాక్ షో ఆహా ఓటీటీ వేదికపై విజయవంతంగా కొనసాగుతోంది. ఇప్పటికే మూడు సీజన్లు పూర్తి చేసుకున్న ఈ టాక్ షో ప్రస్తుతం నాలుగో సీజన్‌ నడుస్తుంది. ఈ సీజన్‌లో అప్పుడే ఆరు ఎపిసోడ్లు స్ట్రీమింగ్ అయ్యాయి. ఏడవ ఎపిసోడ్‌కు విక్టరీ వెంకటేష్ అతిథిగా వచ్చారు.
ఆయన నటిస్తున్న ‘సంక్రాంతికి వస్తున్నాం’ మూవీ ప్రమోషన్స్ లో భాగంగా వెంకటేష్ ఈ కార్యక్రమంలో పాల్గొన్నారు. తాజాగా ఆహా ఈ ఏడవ ఎపిసోడ్‌కు సంబంధించిన ప్రోమోను విడుదల చేశారు. ప్రోమోలో బాలకృష్ణ, వెంకటేష్‌ను వేదికపైకి ఆహ్వానించారు.’ పోటీనా మనం… ఒకరికి ఒకరికి’ అంటూ బాలకృష్ణ వెంకటేష్‌ను ప్రశ్నించగా, దానికి వెంకటేష్ ‘ఎక్కడమ్మా పోటీ?’ అంటూ బదులిచ్చారు.
ప్రోమోను చూస్తుంటే, ఈ ఎపిసోడ్‌లో సరదా కబుర్లతో పాటు కొన్ని ఎమోషనల్ విషయాలను కూడా వెంకటేష్ పంచుకున్నారని సమాచారం. ఇక ఈ ప్రోమో చివర్లో దర్శకుడు అనిల్ రావిపూడి కూడా కనిపించి సందడి చేశారు. డిసెంబర్ 27న రాత్రి 7 గంటలకు ఆహాలో ఈ ఎపిసోడ్ ప్రసారం కానుంది.
