ఏపీలో సాగుతున్న రాజకీయ రణరంగం పుణ్యమాని.. తెలుగు సినిమా ఇండస్ట్రీలో, అదికూడా మెగా కాంపౌండ్ లోనే ఉన్న విభేదాలు కూడా బయటకు వస్తున్నాయి. పిఠాపురం నుంచి ఎమ్మెల్యేగా పోటీచేస్తున్న పవన్ కల్యాణ్ ను తక్కువ చేసినట్టుగా, అల్లు అర్జున్ ప్రవర్తన ఉన్నదని మెగా ఫ్యాన్స్ మండిపడుతున్నారు. పవన్ పట్ల చాలా రోజులుగా తేడాగానే వ్యవహరిస్తున్న అల్లు అర్జున్ తాజాగా ఎన్నికల నేపథ్యంలో.. తన దృష్టిలో ఆయనకు ఉన్న విలువ తక్కువ అని పనిగట్టుకుని నిరూపించాలని అనుకున్నట్టుగా పవన్ ఫ్యాన్స్ భావిస్తున్నారు.
పిఠాపురంలో పవన్ పోటీచేస్తుండగా.. మెగా ఫ్యామిలీ మొత్తం ఆయనకు అనుకూలంగా వ్యవహరించారు. చిరంజీవి వీడియో సందేశం విడుదల చేయగా, ఆయన భార్య సురేఖ, రాంచరణ్ కూడా అక్కడకు వెళ్లి ఆయనకు మద్దతు తెలిపారు. అదే సమయంలో అనేక మంది నటులు పవన్ కు అనుకూలంగా ట్వీట్లు చేశారు. అలాంటి అంకితభావం గల వ్యక్తిని గెలిపించాలని ప్రజలకు విజ్ఞప్తి చేశారు. నలుగురిలో నారాయణా అన్నట్టుగా, తాను కూడా ఒక ట్వీటు చేయకపోతే బాగుండదని భావించినట్టుగా అల్లు అర్జున్ కూడా ఒక ట్వీట్ పెట్టారు. కథ అక్కడితో ఆగిపోతే ఇంకో రకంగా ఉండేది.
కానీ తన దృష్టిలో పవన్ కల్యాణ్ కు ఉన్న విలువ తక్కువే అని నిరూపించాలంటే.. మరొకరికి ఎక్కువ విలువ ఉన్నట్టు చూపించాలి కదా!? రాజుగారి పెద్దభార్య మంచిది అని అంటే.. దాని అర్థం చిన్న భార్య గయ్యాళి అనే కదా! ఆ సూత్రాన్నే అల్లు అర్జున్ ఫాలో అయ్యారు.
నంద్యాల ఎమ్మెల్యేగా వైసీపీ అభ్యర్థి శిల్పా రవిచంద్ర కిశోర్ రెడ్డి ఇంటికి అల్లు అర్జున్ శనివారం ఉదయం అల్పాహారానికి వెళ్లారు. అదేమీ పోలీసు అనుమతి తీసుకున్న యాత్ర, రోడ్ షో, కార్యక్రమం కాదు. కానీ అల్లు అర్జున్ వస్తున్నట్టు ముందుగానే ప్రచారం చేసుకున్న వైసీపీ నాయకులు.. పట్టణ శివారు నుంచి అల్లు అర్జున్ వందల వాహనాలతో ఊరేగింపుగా తీసుకువెళ్లారు. పోలీసు అనుమతులు లేవుగానీ.. భారీ బందోబస్తు ఏర్పాటుచేశారు. ‘తనకు రాజకీయాలతో సంబంధం లేదని, కానీ శిల్పా రవి తనకు ఆత్మీయుడని, ఆత్మీయుడిని గెలిపించమని కోరడానికి వచ్చానని’ అర్జున్ చెప్పుకున్నారు. పిఠాపురంలో పవన్ కోసం ట్వీట్ తో సరిపెట్టి, శిల్పా రవి కోసం స్వయంగా రావడం ద్వారా.. తన దృష్టిలో పవన్ తక్కువే అని ఆయన తేల్చి చెప్పారు.
అనుమతులు లేని పర్యటన కింద.. అల్లు అర్జున్ మీద కేసు నమోదు అయింది. అక్కడి ఎస్పీ మీద కూడా చర్యలకు ఈసీ ఉపక్రమించింది. ఇదంతా ఒక ఎత్తు అయితే.. పవన్ పట్ల ఉండే చులకనభావాన్ని అల్లు అర్జున్ స్పష్టంగా చాటిచెప్పడం గురించి జనం చర్చించుకుంటున్నారు.
