డాషింగ్ డైరెక్టర్ పూరి జగన్నాథ్‌కు గతంలో వచ్చిన లైగర్, డబుల్ ఇస్మార్ట్ సినిమాలు ఆశించిన విజయాన్ని అందించలేకపోయాయి. దీంతో పూరి తన కొత్త ప్రాజెక్ట్‌తో తానేంటి అని మరోసారి చూపించాలనుకుంటున్నాడు. ఈసారి ఆయన పూర్తిగా కొత్త స్టైలలో వెళ్లేందుకు రెడీ అయ్యాడు.
తాజాగా ఆయన విజయ్ సేతుపతిని కథానాయకుడిగా ఎంచుకొని “బెగ్గర్” అనే సినిమాను ప్రకటించాడు. ఇప్పటికే సినిమాపై మంచి హైప్ క్రియేట్ అవుతోంది. ఎందుకంటే ఈ సినిమా పూరి ముందు సినిమాలకు పూర్తి విభిన్నంగా ఉంటుందని టాక్ వినిపిస్తోంది. కథ ఎలా ఉండబోతుందో అనేది ఆసక్తికరంగా మారింది. పూరి ఇప్పటి వరకు రాసిన కథలతో పోలిస్తే, ఈ స్క్రిప్ట్ తాను రాసిన బెస్ట్ వర్క్‌ అని చెబుతున్నారట. దీంతో ఇది ఆయన కెరీర్‌లో ఓ ప్రత్యేకమైన మలుపుగా నిలవబోతోందన్న అభిప్రాయాలు బయటకు వస్తున్నాయి.
విజయ్ సేతుపతి ఇందులో చేసే పాత్ర మరింత ఆసక్తిని రేపుతోంది. ఎందుకంటే ఆయన పాత్రలో మూడు వేర్వేరు షేడ్స్ ఉండబోతున్నాయని సమాచారం. అంటే ఒక్కటే పాత్ర అయినా మూడు భిన్న కోణాల్లో ఆయన కనిపించబోతున్నారు. ఈ విధంగా విజయ్ సేతుపతి టాలెంట్‌కి ఇది మరోసారి ఛాలెంజ్‌లా మారనుంది.
ఇక పూరి గత చిత్రం డబుల్ ఇస్మార్ట్ విషయంలో చూస్తే, రామ్ పోతినేని నటించినా కూడా సినిమా కథాపరంగా బలహీనంగా ఉందనే విమర్శలు వచ్చాయి. ప్రేక్షకులను ఆకట్టుకునేలా కంటెంట్ లేకపోవడమే అసలైన లోపమని చాలామంది అభిప్రాయం వ్యక్తం చేశారు. అందుకే ఇప్పుడు పూరి విజయ్ సేతుపతి కోసం రాసిన కథలో ఎలాంటి కొత్తదనం ఉండబోతుందో అని అందరూ వేచి చూస్తున్నారు.
ఈ సినిమా పూరి కెరీర్‌కు మరో మైలు రాయిగా మారుతుందా లేదా అన్నది విడుదలయ్యే వరకూ తెలియదు కానీ, ఇప్పటి వరకు ఉన్న సమాచారం చూస్తుంటే మాత్రం పూరి ఫ్యాన్స్‌తో పాటు సాధారణ ప్రేక్షకుల్లోనూ ఆసక్తి పెరుగుతోంది.
