నందమూరి బాలకృష్ణ హీరోగా నటిస్తున్న అత్యంత ప్రతిష్టాత్మకమైన డివోషనల్‌ యాక్షన్ డ్రామా అఖండ 2 – తాండవం కోసం అభిమానులు ఎంతగానో ఎదురుచూస్తున్నారు. దర్శకుడు బోయపాటి శ్రీను తెరకెక్కిస్తున్న ఈ భారీ ప్రాజెక్ట్‌పై ఇప్పటికే భారీ అంచనాలు నెలకొన్నాయి. ఈ కాంబినేషన్‌లో వచ్చిన గత చిత్రాలు భారీ హిట్స్ అందుకోవడంతో, ఈ సారి కూడా మరింత శక్తివంతమైన మాస్ అండ్ స్పిరిట్యువల్ ట్రీట్ ఇవ్వబోతున్నారని టాక్ వినిపిస్తోంది.
సమాచారం ప్రకారం, ఈ సినిమా విడుదలకు ముందే థియేట్రికల్ బిజినెస్ పరంగా రికార్డులు సృష్టించింది. ప్రపంచవ్యాప్తంగా అన్ని భాషల్లో కలిపి దాదాపు 100 కోట్లకు పైగా బిజినెస్ జరిగినట్లు ట్రేడ్ సర్కిల్స్ చెబుతున్నాయి. అంటే, బాలయ్య కెరీర్‌లో ఇదే మొదటి సారి థియేట్రికల్ మార్కెట్ 100 కోట్ల మార్క్ దాటిందని చెప్పవచ్చు.
ఇది వసూళ్ల లెక్కల గురించి కాదు, సినిమా బిజినెస్ స్థాయి ఎంత పెరిగిందో చూపించే సూచిక మాత్రమే. దీంతో అఖండ 2 బాలయ్యకు కొత్త మైలురాయిగా నిలిచే అవకాశం ఉంది. ఇక ఈ చిత్రానికి థమన్ సంగీతం అందించగా, భారీ స్థాయిలో నిర్మిస్తున్న నిర్మాతలు ఈ చిత్రాన్ని డిసెంబర్ 5న గ్రాండ్‌గా ప్రేక్షకుల ముందుకు తీసుకురానున్నారు.
