ఆర్చరీ అసోసియేషన్ ఆఫ్ ఇండియా ఆధ్వర్యంలో తొలిసారి జరుగుతున్న ఆర్చరీ ప్రీమియర్ లీగ్‌కి గ్లోబల్ స్టార్ రామ్ చరణ్ బ్రాండ్ అంబాసిడర్‌గా ఎంపికయ్యారు. అక్టోబర్ 2 నుంచి 12 వరకు న్యూఢిల్లీలోని యమునా స్పోర్ట్స్ కాంప్లెక్స్‌లో ఈ లీగ్‌ను నిర్వహించనున్నారు. భారతదేశంలో తొలిసారి ఫ్రాంచైజీ విధానంలో జరగబోతున్న ఈ పోటీల్లో దేశీయ, అంతర్జాతీయ స్థాయి రికర్వ్ మరియు కాంపౌండ్ ఆర్చర్లు పాల్గొనడం ప్రత్యేకతగా నిలుస్తోంది.
మొత్తం ఆరు జట్లు ఈ టోర్నమెంట్‌లో పోటీ పడనున్నాయి. అందులో 36 మంది భారత అగ్రశ్రేణి ఆర్చర్లు, అలాగే 12 మంది ఇతర దేశాల ప్రతిభావంతులు కూడా ఉండబోతున్నారు. లైట్స్ కింద రికర్వ్, కాంపౌండ్ ఆర్చర్లు ఒకే వేదికపై తలపడటం ప్రేక్షకులకు కొత్త అనుభూతిని ఇవ్వనుంది.
ఈ లీగ్ ప్రారంభం ద్వారా దేశంలోని యువ ఆర్చర్లకు పెద్ద వేదిక దొరకబోతుందని నిర్వాహకులు భావిస్తున్నారు. రామ్ చరణ్ చేరికతో ఈ టోర్నమెంట్‌కు మరింత గుర్తింపు వస్తుందని కూడా వారు ఆశిస్తున్నారు. ఆర్చరీకి క్రమశిక్షణ, ఏకాగ్రత, సహనం వంటి విలువలు మిళితమై ఉంటాయి. ఈ లీగ్ ఆ విలువలను మరింతగా ప్రోత్సహించే అవకాశం కల్పిస్తుందని నిర్వాహకులు పేర్కొంటున్నారు.
