మెగాస్టార్ చిరంజీవి తన కెరీర్‌లో మరో బిజీ టైమ్‌ను ఎంజాయ్ చేస్తున్నాడు. ఇప్పటికే ‘విశ్వంభర’ అనే సోషియో ఫాంటసీ సినిమా షూటింగ్ చివరి దశకు చేరుకుంది. ఈ సినిమా పూర్తికాగానే, దర్శకుడు అనిల్ రావిపూడితో చేస్తున్న మెగా157 ప్రాజెక్ట్ పనుల్లోకి చిరు దిగిపోతాడు. ఇలా బ్యాక్‌టు బ్యాక్ సినిమాలతో ఆయన షెడ్యూల్ ఫుల్‌గా ఉంది.
ఇంతకీ చిరు ఇప్పటి సినిమాలతోనే ఆగిపోకుండా, దూసుకుపోయే మూడ్‌లో ఉన్నట్టు తెలుస్తోంది. కొత్తగా ప్లాన్‌లో ఉన్న సినిమాల్లో ఒకటి బాబీ దర్శకత్వంలో తెరకెక్కనుంది. బాబీ అంటే ‘వాల్తేరు వీరయ్య’ గుర్తొస్తుంది. ఆ సినిమా ఎంత పెద్ద హిట్ అయిందో అందరికీ తెలిసిందే. ఇప్పుడు అదే డైరెక్టర్‌తో చిరు మళ్లీ కలసి పనిచేయబోతున్నారని ఫిలింనగర్ టాక్. ఈ కాంబినేషన్‌ పై అధికారిక ప్రకటన రావాల్సి ఉన్నా, అంతా సెటిల్‌ అయినట్టేనని ఇండస్ట్రీలో చర్చ నడుస్తోంది.
సినిమా సెటప్ కూడా స్కెచ్ అవుతోందని సమాచారం. సెప్టెంబర్ 2025లో ఈ ప్రాజెక్ట్ ప్రారంభం కావొచ్చని తెలుస్తోంది. కెమెరామేన్‌గా కార్తిక్ ఘట్టమనేని పని చేయనున్నాడట. ఇప్పటికే ఈ కాంబినేషన్‌పై అభిమానుల్లో కాస్త హైప్ మొదలైపోయింది. బాబీ చిరంజీవికి ఏవిధమైన మాస్ స్క్రిప్ట్ రాసి తెరపై ఉంచబోతున్నాడో అని అందరూ ఉత్కంఠగా ఎదురు చూస్తున్నారు.
ఓవైపు విభిన్నమైన జానర్స్ ట్రై చేస్తూ, మరోవైపు విజయవంతమైన టీమ్‌లతో మళ్లీ జట్టుకట్టే ప్రయత్నం చేస్తూ చిరంజీవి తన నెక్స్ట్ ఫేజ్‌కి ఫుల్ గేర్ లో సిద్ధమవుతున్నాడు.
