పవన్ కళ్యాణ్ తాజా చిత్రం “హరిహర వీరమల్లు” ప్రేక్షకుల ఎదుట కొత్త కోణాన్ని పరిచయం చేసింది. కేవలం యాక్షన్, మాస్ యాటిట్యూడ్ తో కాదు.. ఈ సినిమాలో ఆయన పాత్రలో అంతర్లీనంగా వేద సారాన్ని ప్రతిబింబించే ప్రయత్నం కనిపిస్తుంది. దర్శకులు క్రిష్, జ్యోతికృష్ణల కలయికలో రూపొందిన ఈ సినిమాను ఓ పౌరాణిక సందేశంతో నడిపించారనే చెప్పాలి.
పవన్ పోషించిన వీరమల్లు పాత్రను వేద తత్వంతో ముడిపెట్టి చూపించారు. పంచభూతాలు అంటే భూమి, నీరు, అగ్ని, వాయువు, ఆకాశం అనే ఐదు మూలకాలను ఆయన జీవన విధానంలో భాగంగా మిళితం చేశారు. వాస్తవానికి ఇవి వాస్తుశాస్త్రంలోనూ, వేదాలలోనూ ముఖ్యమైన అంశాలుగా భావిస్తారు. ఈ మూలకాల సమతుల్యతే జీవితం ధర్మబద్ధంగా సాగే మార్గం అని చిత్రంలోని భావన. వీరమల్లు భూమిని లాలించే తీరు, నీటిని పవిత్రంగా భావించడం, అగ్నితో అనుసంధానమైన తపస్సు, గాలితో నడిచే శ్వాసక్రియ, ఆకాశంతో సంబంధిత యాగాది పద్దతులు.. అన్నీ కలిసే ఈ క్యారెక్టర్ లో విస్తారమైన స్పిరిట్యువల్ పునాది కనిపిస్తుంది.
చిత్రంలో ఓ దృశ్యంలో కొండ ప్రాంతంలో ప్రమాదం జరుగుతుందని ముందే అంచనా వేసి గల్ఫమ్ ఖాన్ అనే పాత్రను రక్షిస్తాడు. ఇంకొక సందర్భంలో వర్షం పడని గ్రామంలో వరుణ యాగం చేస్తూ వర్షాన్ని కురిపిస్తాడు. ఇది ఆకాశ మూలకాన్ని శ్రద్ధతో పిలిచే విధానంగా చూపించారు. అంతేకాదు, ఆయన జంతువుల పట్ల కనికరం చూపించడం, ప్రాణుల గౌరవం గురించి మాట్లాడటం అన్నీ వేదంలో చెప్పిన అహింస సిద్ధాంతానికి అర్థం చెప్పేలా ఉంటుంది.
ఇలాంటి లోతైన విషయాలను తెరపై చూపించే సమయంలో విజువల్ ఎఫెక్ట్స్ పెద్దగా ఆకట్టుకోలేకపోయాయి. స్క్రిప్ట్ లో ఉన్న ఆధ్యాత్మికతను పటిష్టంగా చూపించడానికి టెక్నికల్ క్వాలిటీ తక్కువగా ఉండటంతో ప్రేక్షకుల్లో ఆ అంశాలు బలంగా నమోదు కాలేదు. కొన్ని కీలక సన్నివేశాలు కంటెంట్ పరంగా శక్తివంతమైనా, గ్రాఫిక్స్ మాత్రం ఆ స్థాయిలో సహకరించకపోవడం వల్ల అసలు ఆత్మను పునరుత్థానపర్చలేకపోయినట్టు ఉంది.
మొత్తంగా చెప్పాలంటే, వీరమల్లు పాత్ర ఒక యోధుడిగా కాకుండా ఒక వేద సంస్కృతిని ప్రతినిధిగా తీర్చిదిద్దే ప్రయత్నం చేసారు. ఇది పవన్ కళ్యాణ్ సినిమాల్లో కొత్తదనంగా చెప్పుకోవచ్చు. కానీ ఈ ప్రయత్నం పూర్తిగా ప్రేక్షకుడి మనసు తాకాలంటే టెక్నికల్ ఎగ్జిక్యూషన్ మరింత బలంగా ఉండాల్సిన అవసరం ఉంది.
