బాక్సాఫీస్ వద్ద అంచనాలు కొల్లగొట్టే సినిమాల కోసం ఎదురుచూస్తున్న ప్రేక్షకుల్లో ఇప్పుడంతా ఫోకస్ జూనియర్ ఎన్టీఆర్ బాలీవుడ్ ఎంట్రీపై ఉంది. యశ్ రాజ్ ఫిలింస్ నిర్మాణంలో భారీ బడ్జెట్‌తో తెరకెక్కుతున్న వార్ 2 అనే స్పై యాక్షన్ థ్రిల్లర్‌లో ఎన్టీఆర్ కీలక పాత్ర పోషిస్తున్న విషయం తెలిసిందే. ఈ సినిమాలో బాలీవుడ్ స్టార్ హీరో హృతిక్ రోషన్ కూడా భాగమవుతున్నాడు. ఇద్దరు పాన్ ఇండియా స్టార్స్ ఒక్కసారిగా స్క్రీన్‌ పై కనిపించనున్నారన్న వార్తతోనే ఈ ప్రాజెక్ట్ మీద మరింత ఆసక్తి పెరిగింది.
ఈ చిత్రాన్ని దర్శకుడు అయాన్ ముఖర్జీ అద్భుతంగా డిజైన్ చేస్తున్నారని ఇండస్ట్రీలో టాక్. ఇక తెలుగు ప్రేక్షకులకు ఈ సినిమాను మరింత దగ్గర చేయడానికే ప్రముఖ నిర్మాత నాగవంశీ దృష్టి పెట్టారు. ఆయన ఈ సినిమాను తెలుగు వెర్షన్‌గా భారీగా రిలీజ్ చేయడానికి రెడీ అవుతున్నారు. అంతేకాకుండా, ఎన్టీఆర్ ఫ్యాన్స్ కోసం ఓ స్పెషల్ ప్లాన్ కూడా సిద్ధం చేస్తున్నారు.
తెలుగు రాష్ట్రాల్లో తెల్లవారుజామునే ప్రీమియర్ షోలు వేసే ఆలోచనలో నాగవంశీ ఉన్నారు. ఇందుకోసం ప్రభుత్వ అనుమతుల కోసం ప్రయత్నాలు చేస్తున్నట్టు సమాచారం. గతంలో దేవర సినిమాకి కూడా ఇలానే ప్రీమియర్ షోలు ఏర్పాటు చేసిన ఆయన, అదే తరహాలో వార్ 2కి కూడా ప్లాన్ చేస్తున్నారు.
ఇక ఈ చిత్రంలో కియారా అద్వానీ హీరోయిన్‌గా నటిస్తోంది. అన్ని కార్యక్రమాలు పూర్తవుతున్న ఈ సినిమా గ్రాండ్‌ గా ఆగస్టు 14న విడుదల కానుంది. తెలుగు రాష్ట్రాల్లో ఈ సినిమా మొదటి షోలకే భారీ రెస్పాన్స్ రావడానికి అన్ని ఏర్పాట్లు జరుగుతున్నాయి. తారక్ అభిమానులకు ఈ సినిమా పండుగలా మారే అవకాశం కనిపిస్తోంది.
