ధనుష్ ఓ తమిళ్ హీరో అయినా, రీసెంట్‌గా ఆయన నటించిన కొన్ని సినిమాలు తెలుగులోనే ఎక్కువగా ఆకట్టుకుంటున్నాయి. ఇందులో ప్రత్యేకంగా చెప్పుకోవాల్సినవి రెండు సినిమాలు – ఒకటి సార్, ఇంకొకటి కుబేర.
వెంకీ అట్లూరి దర్శకత్వంలో వచ్చిన సార్ సినిమా తమిళంతో పోల్చుకుంటే తెలుగులోనే ఎక్కువ వసూళ్లు సాధించింది. ఇప్పుడు అదే ట్రెండ్ శేఖర్ కమ్ముల తెరకెక్కించిన కుబేర సినిమాకి కూడా వర్తిస్తోంది. ఈ సినిమా పాన్ ఇండియా విడుదలైనా, తెలుగులో అందరూ విశేషంగా ఆదరించారు.
ప్రత్యేకంగా అమెరికా మార్కెట్‌ను చూస్తే, అక్కడ ఈ సినిమా తెలుగు వెర్షన్‌కి వచ్చిన రెస్పాన్స్ మామూలుగా లేదు. నార్త్ అమెరికాలో తమిళ్ వెర్షన్ వసూళ్లు ఇంకా లక్ష డాలర్లను కూడా తాకకపోయినా, తెలుగు వెర్షన్ మాత్రం ఇప్పటికే 3 లక్షల 27 వేల డాలర్ల మార్క్‌ను దాటి పోయింది. మొత్తం మీద 4 లక్షల డాలర్లకు పైగా గ్రాస్ కలెక్ట్ చేస్తూ మంచి మార్క్ కొట్టింది.
ఈ ఫలితాలు చూస్తే, ధనుష్ సినిమాలు ఇప్పుడు తెలుగులోనే ఎక్కువగా కనెక్ట్ అవుతున్నట్టు స్పష్టమవుతుంది. కంటెంట్ పరంగా దగ్గరవ్వడం, తెలుగు ప్రేక్షకుల్లో ఆయనకి పెరిగిన క్రేజ్ – ఇవన్నీ కలిపి ఈ రిజల్ట్ కి కారణాలు. మొత్తంగా చెప్పాలంటే, ఒక తమిళ్ హీరో సినిమాలు తెలుగులో ఈ స్థాయిలో హిట్ కావడం మాత్రం గమనించాల్సిన విషయమే.
