హా..హా..హాసిని అంటూ తెలుగు చిత్ర పరిశ్రమలో తనకంటూ ఓ ప్రత్యేకమైన క్రేజ్‌ ని సొంతం చేసుకుంది ముద్దుగుమ్మ జెనిలీయా. ఇదిలా ఉంటే తాజాగా జెనీలియా బ్రేకప్ వార్త బయటకు వచ్చింది. బొమ్మరిల్లు సినిమాతో విపరీతమైన పాపులారిటీ సంపాదించి తెలుగు ప్రేక్షకులను అలరించిన జెనీలియా తెలుగులోనే కాకుండా హిందీ, తమిళం, మరాఠీ సినిమాల్లో కూడా యాక్ట్‌ చేసింది.
జెనీలియా 2002లో రితేష్ దేశ్‌ముఖ్‌ను ప్రేమించి 2012లో పెళ్లి చేసుకుంది. పెళ్లి తర్వాత కొంత కాలం సినిమాలకు బైబై చెప్పి ఇచ్చి ఇద్దరు కొడుకులకు జన్మనిచ్చింది. తాను ప్రేమలో ఉన్నప్పుడే అర్ధరాత్రి రితేష్ చేసిన మెసేజ్ చూసి కంగారు పడ్డానని జెనీలియా చెప్పుకొచ్చింది. అర్ధరాత్రి 2.30 గంటలకు రితేష్ పంపిన మెసేజ్ చదివి ఏం జరిగిందో అర్థంకాక తీవ్రంగా బాధపడ్డానని చెప్పింది. తాజాగా ఓ ఇంటర్వ్యూలో పాల్గొన్న జెనీలియా.. ‘‘మేం డేటింగ్‌లో ఉన్నప్పుడు ఓ సంఘటన జరిగింది.. దాన్ని ఇప్పటికీ మర్చిపోలేను.. రితీష్‌కి ఆలస్యంగా నిద్రపోయే అలవాటు ఉంది.. నేను త్వరగా నిద్రపోతాను.. ఒకరోజు ఏమైందో తెలియదు కానీ అర్ధరాత్రి తర్వాత రితేష్ నాకు మెసేజ్ పంపాడు. బ్రేకప్ చెప్పుకుందాం అంటూ మెసేజ్ పంపాడు.
ఉదయం ఆ మెసేజ్ చూసి షాక్ అయ్యాను. చాలా బాధగా అనిపించింది. మరుసటి రోజు రితీష్ ఎప్పుడు నిద్ర లేస్తాడా అని ఎదురుచూశాను.. ఉదయం తీరిగ్గా రితేష్ నాకు ఫోన్ చేసి ఏం చేస్తున్నావని అడిగాడు. నాకు కోపం వచ్చింది. మనం ఇక మాట్లాడకపోవడమే మంచిదని అనుకుంటున్నా నువ్వేం అనుకుంటున్నావ్ అని అడిగాను. దీంతో రితీష్ ఏం జరగనట్లు అలా ఎలా మాట్లాడుతున్నావ్ అంటూ అరిచాడు. ఆ తర్వాత రాత్రి జరిగిన సంఘటనను గుర్తు చేసుకుంటూ, తాను కేవలం జోక్‌గా పంపానని, ఆ రోజు ఏప్రిల్ ఫస్ట్ కావడంతో అలా చేశానని రితేష్ చెప్పుకొచ్చాడు.
ఆ తర్వాత అంతా బాగానే ఉందని జెనీలియా తెలిపింది. రితీష్‌ని పెళ్లి చేసుకోవడం తన కెరీర్‌లో తాను తీసుకున్న అత్యుత్తమ నిర్ణయాలలో ఒకటి అని జెనీలియా తెలిపింది.
