మూవీ ఆర్టిస్ట్స్‌ అసోసియేషన్‌ (మా) అధ్యక్షుడు మంచు విష్ణు ఇటీవల ఓ కీలక నిర్ణయం తీసుకున్నారు. హీరో, హీరోయిన్లను విమర్శిస్తూ చేసే వీడియోలను, కామెంట్లను 48 గంటల్లోగా తొలగించాలంటూ డిజిటల్‌ కంటెంట్‌ క్రియేటర్స్‌కు మంచు విష్ణు విజ్ఞప్తి చేశారు. అసత్య వార్తలను ప్రచారం చేస్తోన్న కొన్ని యూట్యూబ్‌ ఛానళ్లను మా అసోసియేషన్‌ రద్దు చేసింది కూడా.
మంచు విష్ణు తీసుకున్న ఈ నిర్ణయం పై సీనియర్ స్టార్‌ హీరోయిన్ మీనా ప్రశంసలు కురిపించారు. మంచు విష్ణు చాలా మంచి పనిచేశారని తన సోషల్‌ మీడియా వేదికగా పోస్ట్‌ పెట్టారు. ‘అసత్య వార్తలను ప్రజల్లోకి తీసుకుని వెళ్తున్న యూట్యూబ్‌ ఛానళ్లపై యాక్షన్‌ తీసుకున్న మూవీ ఆర్టిస్ట్స్‌ అసోసియేషన్‌కు, అధ్యక్షుడు మంచు విష్ణుకు ప్రత్యేక ధన్యవాదాలు. ఇండస్ట్రీ సమగ్రతను కాపాడటంలో మీరు చూపుతోన్న అంకితభావం అభినందనీయం. ఈ విషయంలో ఎందరో నటీనటులు ఎన్నో ఇంబ్బందులు ఎదుర్కొంటున్నారు.
నెగెటివ్‌ కామెంట్స్‌ను ఎదిరించడంలో, మన సంఘాన్ని కాపాడడంలో అందరం కలిసి ముందుకు నడవాలి. మీ మద్దతు ఎప్పుడూ ఉండాలని ఆశిస్తున్నాను. మంచు విష్ణు చాలా మంచి పని చేశారు’ అని మీనా పేర్కొన్నారు. గతంలో మీనా వ్యక్తిగత విషయాలపై కొన్ని యూట్యూబ్‌ ఛానళ్లు ఇష్టానుసారంగా రాసుకొచ్చిన విషయం తెలిసిందే.
