మంచు వారి పెద్దబ్బాయి మంచు విష్ణు డ్రీం ప్రాజెక్టు అయినటువంటి ”కన్నప్ప” చిత్రం గురించి మహా శివరాత్రి రోజు అదిరిపోయే అప్డేట్ ఇవ్వనున్నట్లు చిత్ర బృందం వెల్లడించింది. పరమ శివభక్తుడైన భక్త కన్నప్ప జీవితం ఆధారంగా కన్నప్ప చిత్రాన్ని పాన్‌ ఇండియా లెవల్లో తీర్చి దిద్దుతున్నారు. ఈ చిత్రానికి ఎందరో హాలీవుడ్‌ ప్రముఖ నిపుణులు పని చేస్తున్నారు.
ఈ చిత్రం చాలా భాగం విదేశాల్లోనే చిత్రీకరణ చేసుకుంది. కొద్ది రోజుల క్రితమే న్యూజిలాండ్ , థాయ్‌ లాండ్‌ దేశాల్లో షెడ్యూల్‌ పూర్తి చేసుకుని వచ్చారు. ఈ చిత్రానికి సుమారు 600 మందికి పైగా హాలీవుడ్‌ నిపుణులు రేయిబంవళ్లు సినిమాని తీర్చి దిద్దే పనిలో ఉన్నారు. ఇప్పుడు తిరిగి చిత్ర బృందం న్యూజిలాండ్ నుంచి ఇండియాకి తిరిగి వస్తున్నట్లు మంచు మోహన్ బాబు ప్రకటించారు.
మంచు విష్ణు డ్రీమ్‌ ప్రాజెక్టు మాత్రమే కాకుండా… ఇందులో మంచు వారి మూడు తరాల నటులు నటిస్తుండడంతో సినిమా మీద మరిన్ని అంచనాలు పెరిగాయి. ఇందులో మంచు మోహన్ బాబు, విష్ణు, విష్ణు కుమారుడు భక్తవత్సల్‌ కూడా నటిస్తున్నారు. దీంతో ఈ సినిమా మీద భారీ అంచనాలు నెలకొన్నాయి.
ఈ క్రమంలోనే ఈ చిత్రం గురించి మహా శివరాత్రి పర్వదినాన్ని పురస్కరించుకుని ఓ కీలక అప్డేట్ ను ఇచ్చేందుకు రెడీ అయిపోయింది చిత్రం బృందం. చిత్ర ఫస్ట్‌ లుక్‌ పోస్టర్‌ ను శుక్రవారం మధ్యాహ్నం 2. 55 గంటలకు విడుదల చేస్తామని ప్రకటించారు. ఈ చిత్రంలో మంచు విష్ణు కన్నప్పగా నటిస్తుండగా… ప్రభాస్‌ పరమ శివునిగా మెప్పించనున్నాడు.
భారీ విజువల్‌ ఎఫెక్ట్స్‌ తో ఈ చిత్రం రూపుదిద్దుకుంటుంది. పాన్‌ ఇండియా లెవల్లో ఈ చిత్రం భారీ బడ్జెట్ తో తెరకెక్కుతుంది.
