స్లిమ్ గా తయారైన ముద్దుగుమ్మ అనుష్క!
బాహుబలి తరువాత అనుష్క అంతటి విజయాన్ని అందుకోలేక పోయింది. అనుష్క చివరి సారిగా మిస్ శెట్టి..మిస్టర్ పోలిశెట్టి సినిమాతో అలరించింది. ఈ చిత్రం అందర్నీ ఆకట్టుకుంది. ఆ తరువాత అనుష్క మరో మూవీ చేయలేదు. అసలు ఆ సినిమా తరువాత అనుష్క బయట కూడా ఎక్కడ కనిపించలేదు. దాంతో అనుష్క అసలు ఏం అయ్యిందో..ఏం చేస్తుందో అని కూడా చాలా మంది అనుకుంటున్నారు.
అయితే తాజాగా ఓ మలయాళ సినిమా షూటింగ్‌ లో అనుష్క పాల్గొన్నారు. రోజిన్‌ థామస్‌ దర్శకత్వంలో రూపుదిద్దుకుంటున్న కథనార్‌- ది వైల్డ్‌ సోర్సెరర్‌ సోమవారం నుంచి షూటింగ్‌ మొదలైంది. కథనార్‌ చిత్ర బృందంతో కలిసి ఉన్న ఫొటోలు బయటకు వచ్చాయి. అవి కాస్త సోషల్ మీడియాలో వైరల్‌ గా మారాయి.
ఈ ఫొటోల్లో అనుష్క చాలా సన్నగా కనిపిస్తున్నారు. ఈ చిత్రం కోసం అనుష్క ఇన్నాళ్లు వర్కౌట్‌ లో చేసిందని ఈ ఫొటోలు చూసిన వెంటనే అర్థం అవుతుంది. అయితే ఈ సినిమాను మిస్ శెట్టి..మిస్టర్ పోలిశెట్టి సినిమాకంటే ముందుగానే కథనార్‌ చిత్రానికి సైన్‌ చేసింది. చాలా కాలం గ్యాప్‌ తరువాత ఈ చిత్రం సెట్స్‌ మీదకి వచ్చింది.
ఈ చిత్రానికి రాహుల్‌ సుబ్రమణియన్‌ సంగీతం అందిస్తున్నారు. ఈ సినిమా తరువాత అనుష్క క్రిష్‌ సినిమాలో నటించేందుకు అంగీకరించిందని సమాచారం.
