టాలీవుడ్‌లో తెరకెక్కుతున్న ప్రెస్టీజియస్ మైథలాజికల్ చిత్రం ‘కన్నప్ప’ ఇప్పటికే షూటింగ్ ముగించుకుని పోస్ట్ ప్రొడక్షన్ పనులు జరుపుకుంటోంది. విష్ణు మంచు హీరోగా నటిస్తున్న ఈ సినిమాను దర్శకుడు ముఖేష్ కుమార్ సింగ్ డైరెక్ట్ చేస్తుండగా భారీ తారాగణం ఇందులో నటిస్తున్నారు. ఈ సినిమాను పాన్ ఇండియా చిత్రంగా భారీ బడ్జెట్‌తో డా. మోహన్ బాబు ప్రొడ్యూస్ చేస్తున్నారు. ఇక ఈ సినిమా రిలీజ్ డేట్ గతంలో పలుసార్లు వాయిదా పడి ఈ ఏప్రిల్ 25న గ్రాండ్ రిలీజ్ చేయబోతున్నట్లు చిత్ర యూనిట్ ప్రకటించింది.
ఇక ఈ సినిమా ప్రమోషన్స్ కూడా చిత్ర యూనిట్ ప్రారంభించింది. అయితే, ఇప్పుడు అందరికీ షాక్ ఇస్తూ ఈ చిత్ర రిలీజ్ డేట్‌ను మరోసారి వాయిదా వేశారు చిత్ర యూనిట్. ఈ సినిమాను అద్భుతమైన వీఎఫ్ఎక్స్ వర్క్‌తో తెరకెక్కిస్తున్నామని.. దీని కోసం మరికొన్ని వారాల సమయం పడుతుందని.. మంచి క్వాలిటీతో ఈ సినిమాను ప్రేక్షకులకు అందించాలని తాము కష్టపడుతున్నామని.. అందుకే ఈ సినిమా రిలీజ్ డేట్ వాయిదా వేస్తున్నట్లు విష్ణు మంచు పేర్కొన్నాడు.
ఈ మేరకు ఆయన ఓ అఫీషియల్ నోట్ కూడా రిలీజ్ చేశారు. త్వరలోనే ఈ సినిమాను బెస్ట్ అవుట్‌పుట్‌తో ప్రేక్షకుల ముందుకు తీసుకొస్తామని.. త్వరలోనే మరో కొత్త రిలీజ్ డేట్‌ను ప్రకటిస్తామని ఆయన తెలిపారు.
